౮. వస్ససుత్తవణ్ణనా

౧౦౩౪. పారం వుచ్చతి నిబ్బానం సంసారమహోఘస్స పరతీరభావతో. తేనాహ – ‘‘తిణ్ణో పారఙ్గతో, థలే తిట్ఠతి బ్రాహ్మణో (సం. ని. ౪.౨౩౮; ఇతివు. ౬౯; పు. ప. ౧౮౮), యే జనా పారగామినో’’తి (ధ. ప. ౮౫) చ. అథ వా పాతి రక్ఖతీతి పారం, నిబ్బానం. యో పటివిజ్ఝతి, తం వట్టదుక్ఖతో పాతి రక్ఖతి, అచ్చన్తహితేన చ విముత్తిసుఖేన చ రమేతి, తస్మా పారన్తి వుచ్చతి. గచ్ఛమానా ఏవాతి పారం నిబ్బానం గచ్ఛమానా ఏవ. తే ధమ్మా ఆసవానం ఖయాయ సంవత్తన్తి సచ్ఛికిరియాపహానపటివేధానం సమకాలత్తా.