౨. దుతియవగ్గో

౧-౨. ఇచ్ఛానఙ్గలసుత్తాదివణ్ణనా

౯౮౭-౯౮౮. కస్మాతిఆది విహారసమాపత్తిఆచిక్ఖణే కారణం విభావేతుం ఆరద్ధం.

ఏవ-వాకారోతి ఏవ-కారో వా-కారో చ. ఏకన్తసన్తత్తా ఏకన్తేన సన్తమనసికారభావతో. సేక్ఖవచనేనేవ తేసం సిక్ఖితబ్బస్స అత్థిభావే సిద్ధేపి సిక్ఖితబ్బరహితేసు తేసుపి సేక్ఖపరియాయస్స వుచ్చమానత్తా సిక్ఖితబ్బసద్దేన సేక్ఖే విసేసేత్వా వుత్తా. ఆసవక్ఖయత్థం సిక్ఖితబ్బస్స అభావేపి దిట్ఠధమ్మసుఖవిహారత్థం ఝానాదిసిక్ఖనేన వినా సిక్ఖితబ్బాభావా ‘‘అసేక్ఖా నామా’’తి వుత్తా. బుద్ధానం పన సబ్బసో సమ్మదేవ పరినిట్ఠితసిక్ఖత్తా ‘‘సిక్ఖామీ’’తి న వుత్తం. ఆనాపానజ్ఝానఫలసమాపత్తి తథాగతవిహారో.

౩-౧౦. పఠమఆనన్దసుత్తాదివణ్ణనా

౯౮౯-౯౯౬. అనిచ్చాదివసేనాతి అనిచ్చదుక్ఖానత్తవసేన. పవిచినతి పకారేహి విచినతి. నిక్కిలేసాతి అపగతకిలేసా విక్ఖమ్భితకిలేసా. పీతిసమ్బోజ్ఝఙ్గో, పస్సద్ధిసమ్బోజ్ఝఙ్గోతి పాఠో.

యాయ అనోసక్కనం అనతివత్తనఞ్చ హోతి, అయం తత్రమజ్ఝత్తుపేక్ఖా మజ్ఝత్తాకారోతి వుత్తా. ఏకచిత్తక్ఖణికాతి ఏకచిత్తుప్పాదపరియాపన్నత్తా.

చత్తున్నం చతుక్కానం వసేన సోళసక్ఖత్తుకా. ఆనాపానసన్నిస్సయేన పవత్తత్తా ఆరమ్మణవసేన పవత్తా ఆనాపానారమ్మణాపి అపరభాగే సతి ఆనాపానస్సతీతి పరియాయేన వత్తబ్బతం అరహతీతి ‘‘ఆనాపానస్సతి మిస్సకా కథితా’’తి వుత్తం. ఆనాపానమూలకాతి ఆనాపానసన్నిస్సయేన పవత్తా సతిపట్ఠానా. తేసం మూలభూతాతి తేసం సతిపట్ఠానానం మూలకారణభూతా. బోజ్ఝఙ్గమూలకాతి బోజ్ఝఙ్గపచ్చయభూతా. తేపి బోజ్ఝఙ్గాతి ఏతే వీసతి సతిపట్ఠానహేతుకా బోజ్ఝఙ్గా. విజ్జావిముత్తిపూరకాతి తతియవిజ్జాయ తస్స ఫలస్స చ పరిపూరణవసేన పవత్తా బోజ్ఝఙ్గా. ఫలసమ్పయుత్తాతి చతుత్థఫలసమ్పయుత్తా, చతుబ్బిధఫలసమ్పయుత్తా వా.

దుతియవగ్గవణ్ణనా నిట్ఠితా.

ఆనాపానసంయుత్తవణ్ణనా నిట్ఠితా.