౫-౧౦. అనుసయసుత్తాదివణ్ణనా

౧౭౬-౧౮౧. థామగతట్ఠేనాతి సత్తసన్తానే థిరభావూపగమనభావేన. థామగతన్తి చ అఞ్ఞేహి అసాధారణో కామరాగాదీనంయేవ ఆవేణికో సభావో దట్ఠబ్బో. కామరాగోవాతి కామరాగో ఏవ అప్పహీనో. సో సతి పచ్చయలాభే ఉప్పజ్జనారహతాయ సన్తానే అనుసేతీతి అనుసయో. సేసేసుపీతి పటిఘానుసయాదీసు. ఓరమ్భాగో వుచ్చతి కామధాతు రూపారూపభావతో హేట్ఠాభూతత్తా. తత్థ పవత్తియా పచ్చయభావతో ఓరమ్భాగియాని యథా ‘‘పచ్ఛియో గోదుహకో’’తి. సంయోజేన్తీతి సంయోజనాని, హేట్ఠా వియ అత్థో వత్తబ్బో. ఉద్ధమ్భాగో మహగ్గతభాగో, తస్స హితానీతి సబ్బం హేట్ఠా వుత్తనయత్తా న వుత్తన్తి అధిప్పాయో.

అనుసయసుత్తాదివణ్ణనా నిట్ఠితా.

ఓఘవగ్గవణ్ణనా నిట్ఠితా.

మగ్గసంయుత్తవణ్ణనా నిట్ఠితా.