౬. మోగ్గల్లానసంయుత్తం

౧-౮. పఠమజ్ఝానపఞ్హసుత్తాదివణ్ణనా

౩౩౨-౩౩౯. కామసహగతేసు సఞ్ఞామనసికారేసు ఉపట్ఠహన్తేసు బ్యాపాదాదిసహగతాపి సఞ్ఞామనసికారా యథాపచ్చయం ఉపట్ఠహన్తియేవాతి వుత్తం ‘‘కామసహగతాతి పఞ్చనీవరణసహగతా’’తి. నీవరణానఞ్హేత్థ నిదస్సనమత్తమేతం, యదిదం కామగ్గహణం. పహీనావసేసా చేత్థ నీవరణా వేదితబ్బా, తస్మా పఞ్చగ్గహణం న కత్తబ్బం. తస్సాతి మహామోగ్గల్లానత్థేరస్స సన్తతో ఉపట్ఠహింసు అచిణ్ణవసితాయ. తేనాహ ‘‘హానభాగియం నామ అహోసీ’’తి. ఆరమ్మణ…పే… సహగతన్తి వుత్తం ఇతరేసం అభావతో.

పఠమజ్ఝానపఞ్హసుత్తాదివణ్ణనా నిట్ఠితా.

౯. అనిమిత్తపఞ్హసుత్తవణ్ణనా

౩౪౦. విపస్సనాసమాధింయేవ, న ఫలసమాధిం. ఛేజ్జకిచ్చం న నిప్ఫజ్జతి అవిచ్ఛేదవసేన అప్పవత్తనతో. నికన్తీతి విపస్సనం అస్సాదేన్తీ పవత్తతణ్హా. సాధేతుం నాసక్ఖి ఉపక్కిలిట్ఠత్తా. నిమిత్తానుసారీతి నిచ్చసుఖఅత్తనిమిత్తానం అపూరణతో రాగదోసమోహనిమిత్తానిపేత్థ నిమిత్తానేవ. వుట్ఠాన…పే… సమాధిన్తి ఏతేన యావ మగ్గో నాధిగతో, తావ వుట్ఠానగామినివిపస్సనమనుయుఞ్జన్తోపి యథారహం అనిమిత్తం అప్పణిహితం సుఞ్ఞతం చేతోసమాధిం అనుయుత్తో విహరతీతి వత్తబ్బతం అరహతీతి దస్సేతి. విపస్సనాసమ్పయుత్తన్తి విపస్సనాసఙ్ఖాతఞాణసమ్పయుత్తం. చేతోసమాధిన్తి చిత్తసీసేన విపస్సనాసమాధిమాహ. ఉపరిమగ్గఫలసమాధిన్తి పఠమమగ్గసమాధిస్స పగేవ అధిగతత్తా.

అనిమిత్తపఞ్హసుత్తవణ్ణనా నిట్ఠితా.

౧౦-౧౧. సక్కసుత్తాదివణ్ణనా

౩౪౧-౩౪౨. అవేచ్చప్పసాదేనాతి వత్థుత్తయం యాథావతో ఞత్వా ఉప్పన్నపసాదేన, మగ్గేనాగతపసాదేనాతి అత్థో. సో పన కేనచి అసంహారియో అసమ్పవేధీతి ఆహ ‘‘అచలప్పసాదేనా’’తి. అభిభవన్తి అత్తనో పుఞ్ఞానుభావేన.

సక్కసుత్తాదివణ్ణనా నిట్ఠితా.

మోగ్గల్లానసంయుత్తవణ్ణనా నిట్ఠితా.