౩. మాతుగామసంయుత్తం

౧. పఠమపేయ్యాలవగ్గో

౧-౨. మాతుగామసుత్తాదివణ్ణనా

౨౮౦-౨౮౧. అగుణఙ్గేహీతి అగుణకోట్ఠాసేహి. రూపయతీతి రూపం, సరీరరూపం. సరీరరూపం పాసంసం ఏతస్స అత్థీతి రూపవా, తప్పటిక్ఖేపేన న చ రూపవా, సమ్పన్నరూపో న హోతీతి అత్థో. ఞాతికులతో అఞ్ఞతో వా ఆగతాయ భోగసమ్పదాయ అభావేన న భోగసమ్పన్నో. దుస్సీలోతి నిస్సీలో. నిస్సీలతాయ ఏవ చస్సా పుబ్బుట్ఠాయితాదిఆచారాభావో వుత్తో. ఆలసియోతి ఆలసియతాయ యుత్తో. పజఞ్చస్స న లభతీతి పజాభావసీసేన తస్సా పరివారహాని వుత్తా. పరివత్తేతబ్బన్తి పురిసవసేన పరివత్తేతబ్బం.

మాతుగామసుత్తాదివణ్ణనా నిట్ఠితా.

౩. ఆవేణికదుక్ఖసుత్తవణ్ణనా

౨౮౨. ఆవేణితబ్బతో మరియాదాయ విసుం అసాధారణతో పస్సితబ్బతో ఆవేణికాని. పటిపచ్చేకే పుగ్గలే నియుత్తానీతి పాటిపుగ్గలికాని. పరిచారికభావన్తి ఉపట్ఠాయికభావం.

ఆవేణికదుక్ఖసుత్తవణ్ణనా నిట్ఠితా.

౪. తీహిధమ్మేహిసుత్తాదివణ్ణనా

౨౮౩-౩౦౩. మచ్ఛేరమలపరియుట్ఠితేనాతి మచ్ఛరియమలేన అభిభూతేన. తేనాతి కస్సచి కిఞ్చి అదానేన చ. ఏతం ‘‘మచ్ఛేరమలపరియుట్ఠితేనా’’తిఆది వుత్తం. విలోకేన్తో విచరతి ఇస్సాపకతచిత్తతాయ. పఞ్చమాదీని యావ ఏకాదసమా ఉత్తానత్థానేవ.

తీహిధమ్మేహిసుత్తాదివణ్ణనా నిట్ఠితా.

౩. బలవగ్గో

౧. విసారదసుత్తవణ్ణనా

౩౦౪. రూపసమ్పత్తి రూపబలం తంసమఙ్గినో ఉపత్థమ్భకభావతో. ఏస నయో సేసేసుపి. బలాని హి సత్తానం వుడ్ఢియా ఉపత్థమ్భకపచ్చయో హోతి, యథా తం ఆహారో. తేనాహ – ‘‘ఇమానీ’’తిఆది.

విసారదసుత్తవణ్ణనా నిట్ఠితా.

౨-౧౦. పసయ్హసుత్తాదివణ్ణనా

౩౦౫-౩౧౩. అభిభవిత్వా సబ్బం అన్తోజనం సామికఞ్చ. నాసేన్తీతి నాసనం అదస్సనం నేన్తి నీహరన్తీతి అత్థో.

పసయ్హసుత్తాదివణ్ణనా నిట్ఠితా.

మాతుగామసంయుత్తవణ్ణనా నిట్ఠితా.