౧. సమాధిమూలకసమాపత్తిసుత్తవణ్ణనా

౬౬౨. సమాధికుసలోతి సమాధిస్మిం కుసలో. తయిదం సమాధికోసల్లత్తం సహ ఝానఙ్గయోగేన చతుబ్బిధో ఝానసమాధి, తస్మా తం తం విభాగం జానన్తస్స సిద్ధం హోతీతి ఆహ – ‘‘పఠమం ఝాన’’న్తిఆది. తత్థ వితక్కవిచారపీతిసుఖేకగ్గతావసేన పఠమం పఞ్చఙ్గికం, పీతిసుఖేకగ్గతావసేన దుతియం తివఙ్గికం, సుఖేకగ్గతావసేన తతియం దువఙ్గికం, ఉపేక్ఖేకగ్గతావసేన చతుత్థం దువఙ్గికమేవాతి ఏవం తస్మిం తస్మిం ఝానే తంతంఅఙ్గానం వవత్థానే కుసలో. సమాపత్తికుసలోతి సమాపజ్జనే కుసలో. హాసేత్వాతి తోసేత్వా. కల్లం కత్వాతి సమాధానస్స పటిపక్ఖధమ్మానం దూరీకరణేన సహకారీకారణఞ్చ సమాధానేన సమాపజ్జనే చిత్తం సమత్థం కత్వా. సేసపదానీతి సేసా తయో కోట్ఠాసా. తతియాదీసు నయేసు అకుసలోపి ఝానత్థాయ పటిపన్నత్తా ‘‘ఝాయీతేవా’’తి వుత్తో.

సమాధిమూలకసమాపత్తిసుత్తవణ్ణనా నిట్ఠితా.