౭. అరహన్తవగ్గో

౧. ఉపాదియమానసుత్తవణ్ణనా

౬౩. గణ్హమానోతి ‘‘ఏతం మమా’’తిఆదినా గణ్హమానో. పాసేనాతి రాగపాసేన. తఞ్హి మారో మారపాసోతి మఞ్ఞతి. తేనాహ ‘‘అన్తలిక్ఖచరో పాసో, య్వాయం చరతి మానసో’’తి (సం. ని. ౧.౧౫౧; మహావ. ౩౩). ముత్తో నామ హోతి అనుపాదియతో సబ్బసో ఖన్ధస్స అభావతో.

ఉపాదియమానసుత్తవణ్ణనా నిట్ఠితా.

౨-౬. మఞ్ఞమానసుత్తాదివణ్ణనా

౬౪-౬౮. ‘‘ఏతం మమా’’తిఆదినా. మఞ్ఞనా అభినన్దనా చ. తణ్హాఛన్దోతి తణ్హా ఏవ ఛన్దో. సా హి తణ్హాయనట్ఠేన తణ్హా, ఛన్దికతట్ఠేన ఛన్దో. చతుత్థం అనిచ్చలక్ఖణముఖేన వుత్తం, పఞ్చమం దుక్ఖలక్ఖణముఖేన, ఛట్ఠం అనత్తలక్ఖణముఖేన. సేసం తీసుపి సదిసమేవాతి వుత్తం ‘‘ఏసేవ నయో’’తి.

మఞ్ఞమానసుత్తాదివణ్ణనా నిట్ఠితా.

౭. అనత్తనియసుత్తవణ్ణనా

౬౯. అనత్తనియన్తి న అత్తనియం. తేనాహ ‘‘న అత్తనో సన్తక’’న్తి.

అనత్తనియసుత్తవణ్ణనా నిట్ఠితా.

౮-౧౦. రజనీయసణ్ఠితసుత్తాదివణ్ణనా

౭౦-౭౨. రజనీయేనాతి రజనీయేన రాగుప్పాదకేన. తేనాహ ‘‘రాగస్స పచ్చయభావేనా’’తి. రాహులసంయుత్తే రాహులత్థేరస్స పుచ్ఛావసేన ఆగతా. ఇధ రాధత్థేరస్స సురాధత్థేరస్స చ పుచ్ఛావసేన, పాళి పన సబ్బత్థ సదిసా. తేనాహ ‘‘వుత్తనయేనేవ వేదితబ్బానీ’’తి.

రజనీయసణ్ఠితసుత్తాదివణ్ణనా నిట్ఠితా.

అరహన్తవగ్గవణ్ణనా నిట్ఠితా.