౧. ఉపయసుత్తవణ్ణనా

౫౩. ఉపేతీతి ఉపయో. కథముపేతి? తణ్హామానాదివసేనాతి ఆహ ‘‘తణ్హామానదిట్ఠివసేనా’’తి. కథమిదం లబ్భతీతి? ‘‘అవిముత్తో’’తి వచనతో. తణ్హాదిట్ఠివసేన హి బద్ధో, కిం ఉపేతీతి ఆహ ‘‘పఞ్చక్ఖన్ధే’’తి తబ్బినిముత్తస్స తథా ఉపేతస్స అభావతో. కో పనుపేతీతి? తంసమఙ్గీపుగ్గలో. తణ్హాదిట్ఠివసేన ఉపగమస్స వుత్తత్తా విఞ్ఞాణన్తి అకుసలకమ్మవిఞ్ఞాణమేవాతి వదన్తి. జవాపేత్వాతి గహితజవం కత్వా. యథా పటిసన్ధిం ఆకడ్ఢితుం సమత్థం, ఏవం కత్వా. తేనాహ ‘‘పటిసన్ధీ’’తిఆది. అగ్గహణే కారణం వుత్తమేవ ‘‘ఓకం పహాయ అనికేతసారీ’’తి గాథాయ విస్సజ్జనే. కమ్మనిమిత్తాదివసేన పటిసన్ధియా పచ్చయభూతం ఆరమ్మణం పటిసన్ధిజనకస్స కమ్మస్స వసేన వోచ్ఛిజ్జతి. పతిట్ఠా న హోతి సరాగకాలే వియ అనుపట్ఠానతో. అప్పతిట్ఠితం విఞ్ఞాణం వుత్తప్పకారేన. అనభిసఙ్ఖరిత్వాతి అనుప్పాదేత్వా పచ్చయఘాతేన.

ఉపయసుత్తవణ్ణనా నిట్ఠితా.