౧. అత్తదీపసుత్తవణ్ణనా

౪౩. ద్వీహి భాగేహి ఆపో ఏత్థ గతాతి దీపో, దీపో వియాతి దీపో ఓఘేహి అనజ్ఝోత్థరనీయతాయ. యో పరో న హోతి, సో అత్తా, ఇధ పన ధమ్మో అధిప్పేతో. అత్తా దీపో ఏతేసన్తి అత్తదీపా. పటిసరణత్థో దీపట్ఠోతి ఆహ – ‘‘అత్తసరణాతి ఇదం తస్సేవ వేవచన’’న్తి. లోకియలోకుత్తరో ధమ్మో అత్తా నామ ఏకన్తనాథభావతో. పఠమేన పదేన వుత్తో ఏవ అత్థో దుతియపదేన వుచ్చతీతి వుత్తం ‘‘తేనేవాహా’’తిఆది. యవతి ఏతస్మా ఫలం పసవతీతి యోని, కారణం. కిం పభుతి ఉప్పత్తిట్ఠానం ఏతేసన్తి కిం పభుతికా. పహానదస్సనత్థం ఆరద్ధం. తేనేవాహ ‘‘పుబ్బే చేవ…పే… తే పహీయన్తీ’’తి. న పరితస్సతి తణ్హాపరిత్తాసస్స అభావతో. విపస్సనఙ్గేనాతి విపస్సనాసఙ్ఖాతేన కారణేన.

అత్తదీపసుత్తవణ్ణనా నిట్ఠితా.