౧౫. దిట్ఠివగ్గో

౧-౯. అజ్ఝత్తసుత్తాదివణ్ణనా

౧౫౦-౧౫౮. పచ్చయం కత్వాతి అభినివేసపచ్చయం కత్వా. ఆదిసద్దేన మిచ్ఛాదిట్ఠిసక్కాయదిట్ఠిఅత్తానుదిట్ఠి సఞ్ఞోజనాభినివేస-వినిబన్ధఅజ్ఝోసానాని సఙ్గణ్హాతి. తత్థ అభినివేసా తణ్హామానదిట్ఠియో. వినిబన్ధా ‘‘కాయే అవీతరాగో హోతీ’’తిఆదినా (దీ. ని. ౩.౩౨౦; మ. ని. ౧.౧౮౬) ఆగతచేతసోవినిబన్ధా. అజ్ఝోసానాతి తణ్హాదిట్ఠిజ్ఝోసానాని. సేసాని సువిఞ్ఞేయ్యానేవ.

అజ్ఝత్తసుత్తాదివణ్ణనా నిట్ఠితా.

౧౦.ఆనన్దసుత్తవణ్ణనా

౧౫౯. ధరమానకాలేతి జీవమానకాలే. పహానం అపస్సన్తోతి థేరస్స కిర భగవతి పేమం అధిమత్తం. చిత్తం గణ్హిస్సామీతి చిత్తం ఆరాధేస్సామి. గన్తబ్బం హోతి, తస్మా సపలిబోధో. చిత్తం సమ్పహంసమానోతి చిత్తస్స విబోధనో. విముత్తి…పే… జాతో ఆయతిం పటివేధపచ్చయత్తా, న పన తదా విసేసావహభావా నిబ్బేధభాగియో.

ఆనన్దసుత్తవణ్ణనా నిట్ఠితా.

దిట్ఠివగ్గవణ్ణనా నిట్ఠితా.

ఉపరిపణ్ణాసకో సమత్తో.

సారత్థప్పకాసినియా సంయుత్తనికాయ-అట్ఠకథాయ

ఖన్ధసంయుత్తవణ్ణనాయ లీనత్థప్పకాసనా సమత్తా.