౨. రాధసంయుత్తం

౧. పఠమవగ్గో

౧. మారసుత్తవణ్ణనా

౧౬౦. మారసద్దోయం భావసాధనోతి దస్సేన్తో ‘‘మారో వా అస్సాతి మరణం వా భవేయ్యా’’తి ఆహ. మారేతాతి మరితబ్బో మారం మరణం ఏతబ్బోతి ఆహ ‘‘మారేతబ్బో’’తి. అనుపాదానిబ్బానత్థాతి ఫలవిముత్తిసఙ్ఖాతా అరహతో అరహన్తతా నామ యావదేవ అనుపాదానిబ్బానత్థా. నిబ్బానబ్భన్తరేతి అనుపాదానిబ్బానాధిగమస్స అబ్భన్తరే తతో ఓరమేవ ఇదం మగ్గం బ్రహ్మచరియం వుస్సతి, న తతో పరం. అస్సాతి బ్రహ్మచరియస్స.

మారసుత్తవణ్ణనా నిట్ఠితా.

౨-౧౦. సత్తసుత్తాదివణ్ణనా

౧౬౧-౧౬౯. లగ్గపుచ్ఛాతి లగ్గనస్స బజ్ఝనస్స పుచ్ఛా. యది రూపాదీసు సత్తత్తా సత్తో, ఖీణాసవా కథం సత్తాతి? సత్తభూతపుబ్బాతి కత్వా. కీళావిగమన్తి కీళాయ అపనయనం ఓరమణం. యన్తరజ్జు వియ భవపబన్ధస్స నయనతో భవరజ్జూతి తణ్హా వుత్తా.

సత్తసుత్తాదివణ్ణనా నిట్ఠితా.

పఠమవగ్గవణ్ణనా నిట్ఠితా.

౨. దుతియవగ్గో

౧-౧౨. మారసుత్తాదివణ్ణనా

౧౭౦-౧౮౧. రూపాదివినిముత్తం మరణం నామ నత్థి రూపాదీనంయేవ విభవే మరణసమఞ్ఞాతి. మరణధమ్మో వినాసభావో.

మారసుత్తాదివణ్ణనా నిట్ఠితా.

దుతియవగ్గవణ్ణనా నిట్ఠితా.

౩-౪. ఆయాచనవగ్గాది

౧-౧౧. మారాదిసుత్తఏకాదసకవణ్ణనా

౧౮౨-౨౦౫. సుఖుమం కారణం ఉపట్ఠాతి, తేనేస థేరో పటిభానేయ్యకానం ఏతదగ్గే ఠపితో. విముత్తిపరిపాచనీయధమ్మవసేనేవ, న పటివేధావహభావేన.

మారాదిసుత్తఏకాదసకవణ్ణనా నిట్ఠితా.

ఆయాచనవగ్గాదివణ్ణనా నిట్ఠితా.

సారత్థప్పకాసినియా సంయుత్తనికాయ-అట్ఠకథాయ

రాధసంయుత్తవణ్ణనాయ లీనత్థప్పకాసనా సమత్తా.