౧౧. అన్తవగ్గో

౧. అన్తసుత్తవణ్ణనా

౧౦౩. అఞ్ఞమఞ్ఞం అసంసట్ఠభావేన ఏతి గచ్ఛతీతి అన్తో, భాగోతి ఆహ ‘‘అన్తాతి కోట్ఠాసా’’తి. ‘‘సక్కాయనిరోధన్తో’’తి నిరోధపచ్చయస్స గహితత్తా వుత్తం ‘‘చతుసచ్చవసేన పఞ్చక్ఖన్ధే యోజేత్వా’’తి. అన్తోతి…పే… అజ్ఝాసయవసేన వుత్తం యథానులోమదేసనత్తా సుత్తన్తదేసనాయ.

అన్తసుత్తవణ్ణనా నిట్ఠితా.

౨-౩. దుక్ఖసుత్తాదివణ్ణనా

౧౦౪-౧౦౫. దుతియమ్పీతి అపి-సద్దో సమ్పిణ్డనత్థో. తేన న కేవలం పఠమసుత్తమేవ, అథ ఖో దుతియమ్పీతి.

తతియమ్పి తథేవాతి ఇమినా ‘‘పఞ్చక్ఖన్ధే చతుసచ్చవసేన యోజేత్వా’’తి ఇదం ఉపసంహరతి.

దుక్ఖసుత్తాదివణ్ణనా నిట్ఠితా.

౪. పరిఞ్ఞేయ్యసుత్తవణ్ణనా

౧౦౬. పరిఞ్ఞేయ్యేతి ఏత్థ తిస్సో పరిఞ్ఞా ఞాతపరిఞ్ఞా, తీరణపరిఞ్ఞా, పహానపరిఞ్ఞాతి. తాసు ఞాతపరిఞ్ఞా యావదేవ తీరణపరిఞ్ఞత్థా. తీరణపరిఞ్ఞా చ యావదేవ పహానపరిఞ్ఞత్థాతి. తత్థ ఉక్కట్ఠాయ పరిఞ్ఞాయ కిచ్చదస్సనవసేన అత్థం దస్సేన్తో ‘‘పరిఞ్ఞేయ్యేతి పరిజానితబ్బే సమతిక్కమితబ్బే’’తి, పహాతబ్బేతి అత్థో. తేనాహ భగవా – ‘‘కతమా చ, భిక్ఖవే, పరిఞ్ఞా? రాగక్ఖయో, దోసక్ఖయో, మోహక్ఖయో’’తి, తస్మా సమతిక్కమన్తి, సమతిక్కన్తం పహానస్స ఉపాయం. సమతిక్కమిత్వా ఠితన్తి పజహిత్వా ఠితన్తి అయమేత్థ అత్థో.

పరిఞ్ఞేయ్యసుత్తవణ్ణనా నిట్ఠితా.

౫-౧౦. సమణసుత్తాదివణ్ణనా

౧౦౭-౧౧౨. చత్తారి సచ్చాని కథితాని అస్సాదాదీనం సముదయాదీనఞ్చ దేసితత్తా.

కిలేసప్పహానం కథితం రాగప్పహానస్స జోతితత్తా.

సమణసుత్తాదివణ్ణనా నిట్ఠితా.

అన్తవగ్గవణ్ణనా నిట్ఠితా.