౧౨. ధమ్మకథికవగ్గో

౧-౨. అవిజ్జాసుత్తాదివణ్ణనా

౧౧౩-౧౧౪. యావతాతి యస్మా. ఇమాయ…పే… సమన్నాగతోతి ‘‘ఇదం దుక్ఖన్తి యథాభూతం నప్పజానాతీ’’తిఆదినా నయేన వుత్తాయ చతూసు అరియసచ్చేసు అఞ్ఞాణసభావాయ అవిజ్జాయ సమ్మోహేన సమన్నాగతో. ఏత్తావతాతి ఏత్తకేన కారణేన అవిజ్జాగతో సమఙ్గీభూతేన ఉపగతో, అవిజ్జాయ వా ఉపేతో నామ హోతి.

దుతియేపీతి విజ్జాసుత్తే. ‘‘విజ్జావసేన దేసనా’’తి అయమేవ విసేసోతి ఆహ ‘‘ఏసేవ నయో’’తి.

అవిజ్జాసుత్తాదివణ్ణనా నిట్ఠితా.

౩. ధమ్మకథికసుత్తవణ్ణనా

౧౧౫. పఠమేన ధమ్మకథికో కథితో ‘‘ధమ్మం దేసేతీ’’తి వుత్తత్తా. దుతియేన సేఖభూమి కథితా ‘‘పటిపన్నో హోతీ’’తి వుత్తత్తా, తతియేన అసేఖభూమి కథితా ‘‘అనుపాదావిముత్తో హోతీ’’తి వుత్తత్తా. ధమ్మకథికం పుచ్ఛితేన భగవతా. విసేసేత్వాతి ధమ్మకథికభావతో విసేసేత్వా ఉక్కంసేత్వా. ద్వే భూమియోతి సేక్ఖాసేక్ఖభూమియో.

ధమ్మకథికసుత్తవణ్ణనా నిట్ఠితా.

౪. దుతియధమ్మకథికసుత్తవణ్ణనా

౧౧౬. తీణి విస్సజ్జనానీతి యథాపుచ్ఛం తీణి విస్సజ్జనాని.

దుతియధమ్మకథికసుత్తవణ్ణనా నిట్ఠితా.

౫-౯. బన్ధనసుత్తాదివణ్ణనా

౧౧౭-౧౨౧. తీరం వుచ్చతి వట్టం ఓరిమతీరన్తి కత్వా. తేనాహ ‘‘అథాయం ఇతరా పజా, తీరమేవానుధావతీ’’తి (ధ. ప. ౮౫). పారం వుచ్చతి నిబ్బానం సంసారస్స పారిమన్తి కత్వా. బద్ధోతి అనుసయప్పహానస్స అకతత్తా కిలేసబన్ధనేన బద్ధో, సుక్కపక్ఖేపి దిట్ఠిసమనుపస్సనాయ రూపాదిబన్ధనస్స పటిక్ఖేపమత్తమేవ వుత్తం, న విమోక్ఖన్తి అధిప్పాయో. ఇమస్మిం సుత్తే వట్టదుక్ఖం కథితన్తి ‘‘తీరదస్సీ పారదస్సీ, పరిముత్తో సో దుక్ఖస్మాతి వదామీ’’తి ఆగతత్తా వట్టవివట్టం కథికన్తి వత్తుం సక్కా.

ఛట్ఠాదీని ఉత్తానత్థానేవ హేట్ఠా వుత్తనయత్తా.

బన్ధనసుత్తాదివణ్ణనా నిట్ఠితా.

౧౦. సీలవన్తసుత్తవణ్ణనా

౧౨౨. ఆబాధట్ఠేనాతి ఆదితో ఉప్పత్తితో పట్ఠాయ బాధనట్ఠేన రుజనట్ఠేన. అన్తోదోసట్ఠేనాతి అబ్భన్తరే ఏవ దుస్సనట్ఠేన కుప్పనట్ఠేన. ఖణనట్ఠేనాతి ససనట్ఠేన. దుక్ఖట్ఠేనాతి దుక్ఖమత్తా దుక్ఖభావేన. దుక్ఖఞ్హి లోకే ‘‘అఘ’’న్తి వుచ్చతి అతివియ హననతో. విసభాగం …పే… పచ్చయట్ఠేనాతి యథాపవత్తమానానం ధాతాదీనం విసభాగభూతమహాభూతసముట్ఠానస్స ఆబాధస్స పచ్చయభావేన. అసకట్ఠేనాతి అనత్తనియతో. పలుజ్జనట్ఠేనాతి పకారతో భిజ్జనట్ఠేన. సత్తసుఞ్ఞతట్ఠేనాతి సత్తసఙ్ఖాతఅత్తసుఞ్ఞతట్ఠేన. అత్తాభావేనాతి దిట్ఠిగతికపరికప్పితస్స అత్తనో అభావేన. సుఞ్ఞతో అనత్తతోతి ఏత్థ ‘‘పరతో’’తి పదస్స సఙ్గహో కాతబ్బో, తస్మా ‘‘ద్వీహి అనత్తమనసికారో’’తి వత్తబ్బం.

సీలవన్తసుత్తవణ్ణనా నిట్ఠితా.

౧౧. సుతవన్తసుత్తవణ్ణనా

౧౨౩. తథా ఏకాదసమేతి ఏత్థ తథా-సద్దేన ‘‘ఉత్తానమేవా’’తి ఇదం ఆకడ్ఢతి. ఇధాతి ఏకాదసమే. కమ్మట్ఠానస్స ఉగ్గహధారణపరిచయమనసికారవసేన పవత్తఞాణం కమ్మట్ఠానసుతవసేన నిప్ఫజ్జనతో ‘‘సుత’’న్తి వుత్తం.

సుతవన్తసుత్తవణ్ణనా నిట్ఠితా.

౧౨-౧౩. కప్పసుత్తాదివణ్ణనా

౧౨౪-౧౨౫. రాహులోవాదసదిసానీతి రాహులోవాదసుత్తే (మ. ని. ౨.౧౧౩ ఆదయో) ఆగతసుత్తసదిసాని.

కప్పసుత్తాదివణ్ణనా నిట్ఠితా.

ధమ్మకథికవగ్గవణ్ణనా నిట్ఠితా.