౮. తతియఓవాదసుత్తవణ్ణనా

౧౫౧. పుబ్బేతి పఠమబోధియం. ఏతరహీతి తతో పచ్ఛిమే కాలే. కారణపట్ఠపనేతి కారణారమ్భే. తేసు వుత్తగుణయుత్తేసు థేరేసు. తస్మిన్తి తస్మిం యథావుత్తగుణయుత్తే పుగ్గలే. ఏవం సక్కారే కయిరమానేతి ‘‘భద్దకో వతాయం భిక్ఖూ’’తి ఆదరజాతేహి భిక్ఖూహి సక్కారే కయిరమానే. ఇమే సబ్రహ్మచారీ. ‘‘ఏహి భిక్ఖూ’’తి తం భిక్ఖుం అత్తనో ముఖాభిముఖం కరోన్తా వదన్తి. యఞ్హి తన్తి ఏత్థ తన్తి నిపాతమత్తం ఉపద్దవోతి వుచ్చతి అనత్థజననతో. పత్థయతి భజతి బజ్ఝతీతి పత్థనా, అభిసఙ్గోతి ఆహ ‘‘అభిపత్థనాతి అధిమత్తపత్థనా’’తి.

తతియఓవాదసుత్తవణ్ణనా నిట్ఠితా.