౪. నవసుత్తవణ్ణనా

౨౩౮. అభిచేతసి నిస్సితా ఆభిచేతసికా. పటిపక్ఖవిధమనేన అభివిసిట్ఠం చిత్తం అభిచిత్తం. యస్మా ఝానానం తంసమ్పయుత్తం చిత్తం నిస్సాయ పచ్చయో హోతియేవ, తస్మా ‘‘నిస్సితాన’’న్తి వుత్తం. నికామలాభీతి యథిచ్ఛితలాభీ. యథాపరిచ్ఛేదేనాతి యథాకతేన కాలపరిచ్ఛేదేన. విపులలాభీతి అప్పమాణలాభీ. ‘‘కసిర’’న్తి హి పరిత్తం వుచ్చతి, తప్పటిపక్ఖేన అకసిరం అప్పమాణం. తేనాహ ‘‘పగుణజ్ఝానోతి అత్థో’’తి. సిథిలమారబ్భాతి సిథిలం వీరియారమ్భం కత్వాతి అత్థోతి ఆహ ‘‘సిథిలం వీరియం పవత్తేత్వా’’తి.

నవసుత్తవణ్ణనా నిట్ఠితా.