౪. పఠమసఙ్గామసుత్తవణ్ణనా

౧౨౫. వేదేన ఞాణేన ఈహతి ఇరియతీతి వేదేహీ, కోసలరాజభగినీ అజాతసత్తునో మాతా, సా కిర సమ్పజఞ్ఞజాతికా. తేనాహ ‘‘పణ్డితాధివచన’’న్తి, చత్తారి అఙ్గాని ఏతిస్సన్తి చతురఙ్గినీ. ద్విన్నం రజ్జానన్తి కాసికరజ్జమగధరజ్జానం అన్తరే, సో పన గామో కాసికరజ్జో.

పాపాతి లామకా నిహీనాచారా. మేజ్జతి సినియ్హతీతి మేత్తి, సా ఏతేసు అత్థీతి మిత్తా. సహ అయన్తి పవత్తన్తీతి సహాయా. సమ్పవఙ్కన్తి సుట్ఠు ఓనతం. జయకారణం దిస్వా ఆహ, తథా హి ‘‘అజ్జ ఇమం రత్తిం దుక్ఖం సేతీ’’తి కాలపరిచ్ఛేదవసేన వుత్తం. వేరిఘాతో నామ వేరిపుగ్గలే సతీతి ఆహ ‘‘వేరిపుగ్గలం లభతీ’’తి.

పఠమసఙ్గామసుత్తవణ్ణనా నిట్ఠితా.