౯. సత్థారవన్దనాసుత్తవణ్ణనా

౨౬౫. బ్రహ్మజాణుకోతి దక్ఖిణజాణుమణ్డలం పథవియం ఠపేత్వా వన్దమానో బ్రహ్మజాణుకో నామ తథాభూతో హుత్వా. యజితబ్బతో యక్ఖో, పూజనీయో. ఏవం పూజావిసేసయోగతో సక్కోతి ఆహ ‘‘సో యక్ఖోతి సో సక్కో’’తి. సక్కస్స నమక్కారభాజనభూతఞ్హి పుచ్ఛన్తో మాతలి ‘‘కో నామ సో యక్ఖో’’తి ఆహ. గుణనేమిత్తకేహీతి గుణహేతుకేహి అనన్తాని హి బుద్ధానం నామాని, తాని చ ఖో సబ్బానిపి గుణనేమిత్తకానేవ. అనన్తగుణత్తా. వుత్తఞ్హేతం –

‘‘అసఙ్ఖ్యేయ్యాని నామాని, సగుణేన మహేసినో;

గుణేన నామముద్ధేయ్యం, అపి నామసహస్సతో’’తి. –

తస్మా అనోమనామన్తి పరిపుణ్ణగుణనామన్తి అత్థో. సమతిక్కమేనాతి సమ్మా సముచ్ఛిన్దనవసేన అతిక్కమనేన. కిలేసారీనం అపేతచయోతి అపచయో, సో ఆరమితబ్బట్ఠేన ఆరామో ఏతేసన్తి అపచయారామా. తేనాహ ‘‘వట్టవిద్ధంసనే రతా’’తి.

సత్థారవన్దనాసుత్తవణ్ణనా నిట్ఠితా.