౧౧. అరణసుత్తవణ్ణనా

౮౧. రణన్తి కన్దన్తి ఏతేహీతి రణా, రాగాదయో. తేహి అభిభూతతాయ హి సత్తా నానప్పకారం కన్దన్తి పరిదేవన్తి. తే పన సబ్బసో నత్థి ఏతేసం రణాతి అరణా. నిక్కిలేసా ఖీణాసవా. వుసితవాసోతి వుసితబ్రహ్మచరియవాసో. భోజిస్సియన్తి భుజిస్సభావో. తేనాహ ‘‘అదాసభావో’’తి. సమణాతి సమితపాపసమణాతి ఆహ ‘‘ఖీణాసవసమణా’’తి. పుథుజ్జనకల్యాణకాలే లోకియపరిఞ్ఞాయ, సేక్ఖా పుబ్బభాగే లోకియపరిఞ్ఞాయ, పచ్చవేక్ఖణే లోకియలోకుత్తరాయ పరిఞ్ఞాయ పరిఞ్ఞేయ్యం తేభూమకం ఖన్ధపఞ్చకం పరిజానన్తి పరిచ్ఛిజ్జన్తి. ఖీణాసవా పన పరిఞ్ఞాతపరిఞ్ఞేయ్యా హోన్తి. తథా హి తే సామీ హుత్వా పరిభుఞ్జన్తి. వన్దన్తి నం పతిట్ఠితన్తి వుత్తం, వన్దనీయభావో చ సీలసమ్పన్నతాయాతి ఆహ ‘‘పతిట్ఠితన్తి సీలే పతిట్ఠిత’’న్తి. ఇధాతి ఇమస్మిం లోకే. ఖత్తియాతి లక్ఖణవచనన్తి ఆహ ‘‘న కేవలం ఖత్తియావా’’తిఆది.

అరణసుత్తవణ్ణనా నిట్ఠితా.

ఛేత్వావగ్గవణ్ణనా నిట్ఠితా.

సారత్థప్పకాసినియా సంయుత్తనికాయ-అట్ఠకథాయ

దేవతాసంయుత్తవణ్ణనాయ లీనత్థప్పకాసనా సమత్తా.