౧. ఆదిత్తసుత్తవణ్ణనా

౪౧. సీసన్తి దేసనాపదేసో, దేసనాయ అఞ్ఞేసుపి వత్తబ్బేసు కస్సచిదేవ సీసభాగేన అపదిసనం. తేనాహ ‘‘రాగాదీహీ’’తిఆది. దానేనాతి అత్తనో సన్తకస్స పరేసం పరిచ్చజనేన. తం పన పరిచ్చజనం చేతనాయ హోతీతి ఆహ ‘‘దానచేతనాయా’’తి దానపుఞ్ఞచేతనాతి దానమయా పుఞ్ఞచేతనా దాయకస్సేవ హోతి తంసన్తతిపరియాపన్నత్తా. నీహతభణ్డకన్తి ఆదిత్తగేహతో బహి నిక్ఖామితం భణ్డకం. ఏతన్తి ‘‘దిన్నం హోతీ’’తిఆదివచనం. అదిన్నేతి దానముఖే అనియుఞ్జితే భోగే. ‘‘అన్తేనా’’తి జీవితస్స అన్తో అధిప్పేతోతి ఆహ ‘‘మరణేనా’’తి. మమాతి పరిగ్గహితత్తా పరిగ్గహా, భోగా. తేపి కేనచి ఆకారేన వినాసం అనుపగతా మరణేన పహీయన్తి నామాతి వుత్తం ‘‘చోరాదీనం వసేన అవినట్ఠభోగే’’తి. సోభనా అగ్గభూతా రూపాదయో ఏత్థాతి సగ్గో, తం సగ్గం.

ఆదిత్తసుత్తవణ్ణనా నిట్ఠితా.