పఠమగాథాసఙ్గణికం

సత్తనగరేసు పఞ్ఞత్తసిక్ఖాపదవణ్ణనా

౩౩౫. ఏకంసన్తి ఏత్థ భుమ్మత్థే ఉపయోగవచనన్తి ఆహ ‘‘ఏకస్మిం అంసే’’తి. దసనఖసమోధానసముజ్జలన్తి దసన్నం నఖానం సమూహేన సుట్ఠు ఉజ్జలం. ఏత్థ ‘‘సముజ్జల’’న్తి ఇమినా అఞ్జలిన్తి పదస్స ఆదరేన, అభిముఖం వా జలతి దిబ్బతీతి అఞ్జలీతి అత్థం దస్సేతి. ఆసీసమానరూపోవాతి ఏత్థ ఆసీసమానరూపో ఏవాతి అత్థం పటిక్ఖిపన్తో ఆహ ‘‘పచ్చాసీసమానరూపో వియా’’తి. ఏత్థ ‘‘వియా’’తి ఇమినా ‘‘ఆసీసమానో ఇవా’’తి పదవిభాగం కత్వా ఇవసద్దో ఉపమత్థజోతకోతి దస్సేతి. కిస్సాతి ఏత్థ కరణత్థే ఛట్ఠీవిభత్తి హోతీతి ఆహ ‘‘కేన కారణేనా’’తి. ఇధాతి మమ నిసిన్నట్ఠానం. ‘‘ఆగతో’’తి ఇమినా ఇధమాగతోతి ఏత్థ మకారో పదసన్ధికరమత్తోతి దస్సేతి. అస్సాతి ఉపాలిస్స విస్సజ్జేసీతి సమ్బన్ధో. సబ్బత్థాతి సబ్బేసు పఞ్హేసు. ఇతీతి ఏవం.

తత్థాతి విస్సజ్జనే. భద్దకో తే ఉమ్మఙ్గోతి ఏత్థ ఉమ్మఙ్గసద్దో పఞ్హవాచకోతి ఆహ ‘‘భద్దకా తే పఞ్హా’’తి. తత్థ తేతి తవ. కస్మా పఞ్హా ‘‘ఉమ్మఙ్గో’’తి వుచ్చతీతి ఆహ ‘‘పఞ్చా హీ’’తిఆది. హి యస్మా ఉమ్మఙ్గోతి వుచ్చతి, తస్మా పఞ్హా ఉమ్మఙ్గో నామాతి యోజనా. ‘‘ఉమ్ముజ్జిత్వా ఠితత్తా’’తి ఇమినా ఉమ్ముజ్జతీతి ఉమ్మఙ్గోతి వచనత్థం దస్సేతి. ముజధాతు ఉకారస్స అకారో, అవిజ్జన్ధకారసఙ్ఖాతా ఉదకతో ఉమ్ముజ్జతీతి అత్థో. ‘‘తగ్ఘా’’తి నిపాతస్స తస్మా కారణాతి అత్థం దస్సేన్తో ఆహ ‘‘యస్మా’’తిఆది. ‘‘సమ్పటిచ్ఛనత్థే’’తి ఇమినా తగ్ఘసద్దో సాధుఅత్థోతి దస్సేతి, తగ్ఘ సాధూతి అత్థో. తీణియేవాతి ‘‘సమాదహిత్వా విసిబ్బేన్తీ’’తి ఏకం, ‘‘సామిసేనా’’తి ఏకం, ‘‘ససిత్థక’’న్తి ఏకన్తి ఇమాని తీణియేవ.

చతువిపత్తివణ్ణనా

౩౩౬. యం తం పుచ్ఛిమ్హాతి ఏత్థ నిగ్గహితతో పరం అకారలోపోతి ఆహ ‘‘యం తం అపుచ్ఛిమ్హా’’తి. తత్థ యన్తి పఞ్హం. తన్తి తువం. ‘‘త్వ’’న్తిపి పాఠో, అయమేవత్థో. తం తదేవాతి తం తం ఏవ పఞ్హం. అఞ్ఞథాతి అఞ్ఞం ఆకారం.

యే దుట్ఠుల్లా సా సీలవిపత్తీతి ఏత్థ నను సీలవిపత్తిం పుచ్ఛన్తో పఞ్హో నత్థి, కస్మా పన ‘‘సా సీలవిపత్తీ’’తి విస్సజ్జనం వుత్తన్తి ఆహ ‘‘కిఞ్చాపీ’’తిఆది. ఏతన్తి ‘‘యే దుట్ఠుల్లా సా సీలవిపత్తీ’’తి వచనం. తమేవత్థం విత్థారేన్తో ఆహ ‘‘చతూసు హీ’’తిఆది. వత్వాతి సంఖేపేన వత్వా.

తిస్సన్నం విపత్తీనన్తి సీలవిపత్తితో అవసేసానం తిస్సన్నం విపత్తీనం. తత్థాతి ‘‘థుల్లచ్చయ’’న్తిఆదివచనే.

‘‘అబ్భాచిక్ఖన్తీ’’తి పదస్స కత్తారం దస్సేన్తో ఆహ ‘‘వదన్తా’’తి. ‘‘తథాహ’’న్తిఆదినా వదనాకారం దస్సేతి.

‘‘అయం ఛహీ’’తి ఇమినా అయం సాతి ఏత్థ సాసద్దో పదాలఙ్కారోతి దస్సేతి. ఏత్తావతాతి ఏత్తకేన ‘‘థుల్లచ్చయ’’న్తిఆదివచనమత్తేన. విస్సజ్జితం హోతీతి సమ్బన్ధో.

ఛేదనకాదివణ్ణనా

౩౩౭. కతి ఛేదనకానీతిఆదిపుచ్ఛానం అనుసన్ధిపుచ్ఛాభావం దస్సేన్తో ఆహ ‘‘యస్మా పనా’’తిఆది. పుచ్ఛా హి అనుసన్ధిఅననుసన్ధివసేన దువిధా. తత్థ విస్సజ్జనేన అనుసన్ధివసేన పుచ్ఛా అనుసన్ధిపుచ్ఛా నామ, విస్సజ్జనమనపేక్ఖిత్వా యథాకామపుచ్ఛా అననుసన్ధిపుచ్ఛా నామ. తాసం విత్థారో నేత్తిఅట్ఠకథాదీసు గహేతబ్బో. ఇధాపి ‘‘ఏకాదస యావతతియకా’’తి విస్సజ్జనేన అనుసన్ధానత్తా అనుసన్ధిపుచ్ఛా నామ. యస్మా పన విస్సజ్జితోతి సమ్బన్ధో. సఙ్ఖావసేనాతి ఏకాదసా’’తి సఙ్ఖాయ సత్తియా, ఆయత్తేన వా. సఙ్ఖానుసన్ధివసేనేవాతి ‘‘కతీ’’తి సఙ్ఖాయ అనుసన్ధివసేన ఏవ. తేసన్తి పఞ్హానం. తత్థాతి ‘‘ఛ ఛేదనకానీ’’తిఆదిపాఠే. ఇదమేవాతి ఇదం ఏవ వచనం. అపుబ్బన్తి పుబ్బే న వుత్తం, అపోరాణం నవన్తి అత్థో. యం పనేతన్తి యం పన ఏతం వచనం. ‘‘సోళసా’’తి ఇమినా సోదసాతి ఏత్థ దకారస్స ళకారం కత్వా ‘‘సోళసా’’తి పాఠోపి యుజ్జతీతి దస్సేతి. జానన్తి పఞ్ఞత్తాతి ఏత్థ ‘‘ఏవం వత్వా’’తి పాఠసేసం అజ్ఝాహరిత్వా యోజేతబ్బభావం దస్సేన్తో ఆహ ‘‘జాన’’న్తి ఏవం వత్వా పఞ్ఞత్తా’’తి. తేతి ‘‘జాన’’న్తి పఞ్ఞత్తా సిక్ఖాపదాతి అత్థో. ఏవన్తి వక్ఖమాననయేన. పవిసేయ్యాతీతి ఏత్థ ఇతిసద్దో పరిసమానత్థో. ఇతి వేదితబ్బోతి యోజనా.

అసాధారణాదివణ్ణనా

౩౩౮. పురిమ పఞ్హన్తి ‘‘కతి ఛేదనకానీ’’తిఆదిపఞ్హానం పురే వుత్తం పఞ్హం. తత్థాతి ‘‘వీసం ద్వే సతానీ’’తిఆదిపాఠే. ‘‘ద్వేఅనియతేహీ’’తి పదస్స అసమాహారదిగువాక్యం దస్సేన్తో ఆహ ‘‘ద్వీహి అనియతేహీ’’తి. ‘‘సద్ధి’’న్తి ఇమినా సహాదియోగే కరణవచనన్తి దస్సేతి.

గాథాయం ‘‘ధోవనఞ్చ సిక్ఖాపద’’న్తిఆదినా యోజనా కాతబ్బా. ద్వే లోమాతి ద్వే ఏళకలోమసిక్ఖాపదాని.

‘‘సకలో’’తిఆదికాయ అడ్ఢతేయ్యగాథాయ యోజనా సువిఞ్ఞేయ్యావ.

సఙ్ఘమ్హా దస నిస్సరేతి ఏత్థ ‘‘సఙ్ఘమ్హా నిస్సారీయతీ’’తి (పాచి. ౬౮౦, ౭౩౦) ఏవం వుత్తా దసాతి యోజనానయం దస్సేన్తో ఆహ ‘‘సఙ్ఘమ్హా నిస్సారీయతీ’’తిఆది. తత్థాతి భిక్ఖునివిభఙ్గే. తథాతి యథా ఖుద్దకా, తథాతి అత్థో. ఇతీతి ఏవం.

తేసన్తి పారాజికానం. కణ్హసప్పాదయో దురాసదా వియ దురాసదా హోన్తీతి యోజనా. ‘‘దురూపగమనాతి ఇమినా సదధాతుయా గత్యత్థం దస్సేతి. దురాసజ్జనాతి దుక్ఖేన ఆసజ్జితబ్బా, ఆసజ్జితుం న సుకరాతి అత్థో. సమూపమాతి సమఉపమా. సమూపమాకారం దస్సేన్తో ఆహ ‘‘యథా’’తిఆది.

సాధారణన్తి అట్ఠహి పారాజికేహి సాధారణం. ఏకేకస్స పారాజికస్సాతి సమ్బన్ధో. అవిరూళ్హీ భవన్తి తేతి ఏత్థ ఉపమానోపమేయ్యానం పాకటభావం కత్వా యోజనానయం దస్సేన్తో ఆహ ‘‘యథా ఏతే’’తిఆది. అవిరూళ్హిధమ్మాతి అవిరూళ్హీసభావా. పకతిసీలభావేనాతి పకతియా సీలవన్తభావేన, ‘‘పకతిసీలాభావేనా’’తిపి పాఠో, పకతిసీలస్స అభావేన, అభావహేతూతి అత్థో. ఏత్తావతాతి ఏత్తకేన ‘‘అట్ఠేవ పారాజికా’’తిఆదివచనమత్తేన, దస్సితం హోతీతి సమ్బన్ధో. విభత్తియోతి పారాజికాదివసేన విభజితబ్బాతి విభత్తియోతి. తత్థాతి ‘‘తేవీసతి సఙ్ఘాదిసేసా’’తిఆదిపాఠే. సబ్బసఙ్గాహికవచనన్తి సబ్బేసం తిణ్ణం సమథానం, సబ్బాసం వా ఆపత్తీనం సమథానం సఙ్గాహికవచనం. ‘‘ద్వీహి సమథేహీ’’తి సమ్ముఖావినయేన చ పటిఞ్ఞాతకరణేన చాతి ద్వీహి సమథేహి.

ఏతన్తి ‘‘ద్వే ఉపోసథా ద్వే పవారణా’’తి వచనం. విభజనానీతి విభజితబ్బానం విభజనకిరియాయ అవినాభావతో భావవసేన వుత్తం, తస్మా విభజితబ్బాతి విభత్తియోతి వచనత్థో కాతబ్బో. అపరాపి ఇమా విభత్తియో హోన్తీతి యోజనా. హేట్ఠా వుత్తస్స ‘‘విభత్తిమత్తదస్సనేనేవ చేతం వుత్తం, న సమథేహి వూపసమనవసేనా’’తి వచనస్స అత్థనయతో అఞ్ఞం అత్థనయం దస్సేన్తో ఆహ ‘‘అథవా’’తిఆది, ‘‘ఇమాపి విభత్తియో’’తి పదం ‘‘నిస్సాయా’’తి పదే అవుత్తకమ్మం. నిస్సాయ ఆపజ్జన్తీతి సమ్బన్ధో. తాతి ఆపత్తియో. వుత్తప్పకారేహేవాతి తీహి సమథేహీతి వుత్తపకారేహేవ. తంమూలికానన్తి తే ఏవ ఉపోసథాదయో మూలమేతాసన్తి తంమూలికా, తాసం. ఇమినా కారియూపచారేన వుత్తనయం దస్సేతి. తా విభత్తియోతి ఉపోసథాదివిభత్తియో.

పారాజికాదిఆపత్తివణ్ణనా

౩౩౯. ఏవం విస్సజ్జేత్వాతి సమ్బన్ధో. యదిదం ఆపత్తిపారాజికం నామాతి యోజనా. ఆపత్తిపారాజికన్తి ఆపత్తిసఙ్ఖాతం పారాజికం. ‘‘పరాజయమాపన్నో’’తి ఇమినా సాసనతో పుగ్గలం పరాజేతీతి పారాజికన్తి వచనత్థం దస్సేతి. ణ్యపచ్చయో హేతుకత్వత్థవాచకో, యకారస్స కకారో. చుతోతి చవకో. పరద్ధోతి విరద్ధో. భట్ఠోతి పతితో. నిరఙ్కతోతి సఙ్ఘమ్హా అపసారితో. అనీహతే తస్మిం పుగ్గలేతి తస్మిం పుగ్గలే సఙ్ఘమ్హా నీహరిత్వా న హరితే, అనపనీతేతి అత్థో. ‘‘ఉపోసథపవారణాదిభేదో’’తి ఇమినా సంవాససరూపం దస్సేతి. బ్యఞ్జనే ఆదరమకత్వా ‘‘ఏతం ఆపత్తీ’’తి వుత్తం. అయం హీతి అయం ఏవం వక్ఖమానో. ఏత్థాతి గాథాయం. తేన తస్మాతి ఏత్థ ‘‘తస్మా’’తి పదేన ‘‘తేనా’’తి పదస్స కారణత్థం దస్సేతి.

ఏత్థాతి దుతియగాథాయం. ఆదిమ్హి చేవ ఇచ్ఛితబ్బోతి సమ్బన్ధో. హీతి సచ్చం. ఏత్థాతి పరివాసదానాదీసు చతూసు కమ్మేసు. ‘‘సఙ్ఘో’’తిఆదివచనత్థో తిపదభిన్నాధికరణబాహిరత్థసమాసో హోతి, చేవసద్దచసద్దేహి ఆదిసేసపదానం ఉభయపదత్థపధానభావం దస్సేతి, ‘‘ఇచ్ఛితబ్బో’’తి పదం కారకానం కిరియాపేక్ఖత్తా కిరియత్థాయ పక్ఖిత్తం. అస్సాతి ఆపత్తియా, ఇమినా అఞ్ఞపదం దస్సేతి. ఇచ్ఛితబ్బత్థే అపచ్చయం కత్వా తద్ధితన్తిపి వదన్తి. లహుకనయో పనేస. అయం పనేత్థ గరుకనయో – ఆది చ సేసో చ ఆదిసేసా, సఙ్ఘో ఆదిసేసేసు అస్సా ఇచ్ఛితబ్బోతి సఙ్ఘాదిసేసోతి.

అనేకంసికతం పదన్తి ఏత్థ పదన్తి సిక్ఖాపదం. అనేకంసేన కతం అనేకంసికతన్తి దస్సేన్తో ఆహ ‘‘యస్మా ఇదం సిక్ఖాపదం అనేకంసేన కత’’న్తి. యస్మా కతం, తస్మా అనియతోతి పవుచ్చతీతి యోజనా. తత్థాతి అనియతే. యత్థాతి సిక్ఖాపదే. సోపీతి సిక్ఖాపదధమ్మోపి.

అచ్చయేసూతి దోసేసు. తే హి నిద్దోసం అతిక్కమ్మ అయన్తి గచ్ఛన్తి పవత్తన్తీతి అచ్చయాతి వుచ్చన్తి. తేనాతి అచ్చయేన. థూలోతి ఓళారికో. ‘‘థూలత్తా’’తి ఇమినా ‘‘తేనేత’’న్తి ఏత్థ తేనసద్దస్స కారణత్థం దస్సేతి. అచ్చయస్స థూలత్తాతి సమ్బన్ధో. ఏతన్తి ఆపత్తిధమ్మం. ఇమాయ గాథాయ అఞ్ఞేసం లహుకాపత్తీనం థూలో అచ్చయో థుల్లచ్చయోతి వచనత్థం దస్సేతి. ద్వేభావే సతి సంయోగపరత్తా రస్సో హోతీతి దట్ఠబ్బం.

‘‘నిస్సజ్జిత్వా దేసేతబ్బతో’’తి ఇమినా నిస్సజ్జనం నిస్సగ్గో, ఆపత్తిదేసనతో పుబ్బభాగే కత్తబ్బస్స వినయకమ్మస్సేతమధివచనం, సో ఏతస్సత్థీతి నిస్సగ్గియన్తి వచనత్థం దస్సేతి.

కుసలధమ్మసద్దేన కుసలచిత్తమేవ గహేతబ్బన్తి ఆహ ‘‘కుసలధమ్మసఙ్ఖాతం కుసలచిత్త’’న్తి. ‘‘కుసలచిత్తం పాతేతీ’’తి ఇమినా చిత్తం పాతేతీతి పాచిత్తియన్తి వచనత్థం దస్సేతి. ఏత్థ ‘‘చిత్తపాతియ’’న్తి వత్తబ్బే పదవిపరియాయం కత్వా, తకారస్స చ లోపం కత్వా ‘‘పాచిత్తియ’’న్తి వుత్తం. అచిన్తేయ్యో హి పాళినయో. ణ్యపచ్చయో హేతుకత్వత్థవాచకో. నను ‘‘పాతేతి కుసలం ధమ్మ’’న్తి ఇమినావ ‘‘పాచిత్తియ’’న్తి పదస్స నిబ్బచనం సిద్ధం, కస్మా పన ‘‘అపరజ్ఝతి చిత్తసమ్మోహనట్ఠాన’’న్తి వుత్తన్తి ఆహ ‘‘యం పనా’’తిఆది. యస్మా హోతీతి సమ్బన్ధో.

పాటిదేసనీయాసు నిబ్బచనమేవ అదస్సేత్వా కస్మా ‘‘భిక్ఖు అఞ్ఞాతకో సన్తో’’తిఆది వుత్తన్తి ఆహ ‘‘వుత్తగారయ్హభావకారణదస్సనత్థమేవా’’తి. ‘‘పటిదేసేతబ్బతో’’తి ఇమినా అఞ్ఞాపత్తిదేసనానయతో ‘‘గారయ్హ’’న్తిఆదినా పటి విసుం వత్వా దేసేతబ్బాతి పాటిదేసనీయాతి నిబ్బచనం దస్సేతి.

దుక్కటన్తి ఏత్థ దుసద్దో దుట్ఠుఅత్థో చ విరూపత్థో చ హోతీతి దస్సేన్తో ఆహ ‘‘దుట్ఠు కతం, విరూపం వా కత’’న్తి. తన్తి కమ్మం. తం పనేతన్తి దుక్కటం, ఖలితన్తి సమ్బన్ధో. అస్సాతి దుక్కటస్స. తస్సత్థో ఏవం వేదితబ్బోతి యోజనా. హీతి విత్థారో. యం పాపన్తి యోజనా. యదీతి అథ. యదిసద్దో హి అథపరియాయో. ఇదమ్పీతి ఇదమ్పి కమ్మం, పాపన్తి సమ్బన్ధో.

‘‘లపిత’’న్తి ఇమినా దురాభట్ఠన్తి ఏత్థ భాసధాతుయా కథనత్థం దస్సేతి. యన్తి వచనం. కిఞ్చ భియ్యోతి తతో అతిరేకం కథేతబ్బవచనం కిఞ్చాతి అత్థో. సంకిలిట్ఠఞ్చ యం పదన్తి ఏత్థ చకారో పిసద్దత్థో ‘‘పద’’న్తి ఏత్థ యోజేతబ్బో, యంసద్దో కారణత్థోతి ఆహ ‘‘సంకిలిట్ఠం యస్మా తమ్పి పద’’న్తి. తమ్పి పదన్తి తమ్పి వచనం. పదసద్దో హి వచనవాచకో. తమ్పి వచనం యస్మా సంకిలిట్ఠం హోతీతి యోజనా. కథం సంకిలిట్ఠం హోతీతి యోజనా. ‘‘యస్మా’’తి పదేన యంసద్దో కారణత్థోతి దస్సేతి. నన్తి పదం. ‘‘ఏతం ఇతి వుచ్చతీ’’తి సంవణ్ణేతబ్బపదం. ‘‘దుబ్భాసితన్తి ఏతం వుచ్చతీ’’తి సంవణ్ణనాపదం. ఏతన్తి ఏతం పదం, ఏతం వచనన్తి అత్థో.

ఏత్థాతి సేఖియగాథాయ. ఇదన్తి ఆపత్తీనం నిబ్బచనదీపకం వచనం, వుత్తన్తి సమ్బన్ధో. కస్స దీపనత్థం వుత్తన్తి ఆహ ‘‘సఙ్గహితస్స అత్థస్స దీపనత్థ’’న్తి.

తత్థాతి ‘‘ఛన్నమతివస్సతీ’’తిఆదివచనే. గేహన్తి పకతిగేహం. ఇదం పన గేహన్తి యోజనా. విత్థారేన్తో ఆహ ‘‘మూలాపత్తిఞ్హీ’’తిఆది. ‘‘అవివట’’న్తి వత్వా తస్సత్థం దస్సేతుం వుత్తం ‘‘సుచ్ఛన్న’’న్తి. వివటన్తి అచ్ఛన్నం. నాతివస్సనభావం విత్థారేన్తో ఆహ ‘‘మూలాపత్తిఞ్హీ’’తిఆది. వివరన్తో భిక్ఖు నాపజ్జతీతి సమ్బన్ధో. సుద్ధన్తేతి సుద్ధకోట్ఠాసే. ‘‘తస్మా’’తి చ ‘‘తేనా’’తి చ యేభుయ్యేన అత్థతో ఏకం, తస్మా వుత్తం ‘‘తేన కారణేనా’’తి. ఏవఞ్చేతం వివటన్తి ఏవం ఏతం ఛన్నం చే వివటన్తి యోజనా.

పరిపాతియమానానన్తి అభిభూయమానానం. ‘‘రుక్ఖాదిగహనం అరఞ్ఞ’’న్తి ఇమినా పవనన్తి పదస్స అరఞ్ఞపరియాయతం దస్సేతి. గతిసద్దస్స భవభేదాదిఅత్థం పటిక్ఖిపిత్వా పటిస్సరణత్థే హోతీతి దస్సేన్తో ఆహ ‘‘పటిస్సరణం హోతీ’’తి. తన్తి పవనం. తేతి మిగా. ‘‘అస్ససన్తీ’’తి పదేన ‘‘పస్ససన్తీ’’తి అత్థోపి గహేతబ్బో అవినాభావతో, ఆనాపానం కరోన్తీతి అత్థో. ఆకాసోతి అజటాకాసో. పక్ఖీనన్తి విహఙ్గమానం. ‘‘సబ్బేసం సఙ్ఖతధమ్మాన’’న్తి ఇమినా ధమ్మానన్తి ఏత్థ సఙ్ఖతధమ్మోయేవ గహేతబ్బోతి దస్సేతి. ‘‘వినాసోవా’’తి ఇమినా విభవసద్దో వినాసవాచకోతి దస్సేతి. తేసన్తి సబ్బేసమ్పి సఙ్ఖతధమ్మానం. గతీతి పతిట్ఠా. కస్మా విభవో ధమ్మానం గతి హోతీతి ఆహ ‘‘న హీ’’తిఆది. హీతి యస్మా. తేతి సబ్బేపి సఙ్ఖతధమ్మా. వినాసన్తి విభవం. సుచిరమ్పీతి అసీతివస్సాదికాలమ్పి. నిబ్బానం అరహతో గతీతి సంవణ్ణేతబ్బపదం. ‘‘ఖీణాసవస్సా’’తి ఇమినా అరహతోతి పదస్స అత్థం దస్సేతి. ‘‘అనుపాదిసేసనిబ్బానధాతూ’’తి ఇమినా ‘‘నిబ్బాన’’న్తి పదస్స ఇధ అధిప్పేతనిబ్బానం దస్సేతి. గాథాయ తే తే అత్థా సంగహేత్వా గణియన్తి ఏత్థాతి గాథాసఙ్గణికం.

ఇతి పఠమగాథాసఙ్గణికవణ్ణనాయ యోజనా సమత్తా.