మహాసఙ్గామం

వోహరన్తేన జానితబ్బాదివణ్ణనా

౩౬౮-౭౪. మహాసఙ్గామే ఏతేనేవ నయేన వేదితబ్బన్తి సమ్బన్ధో. వత్థుసఙ్కమనాకారం దస్సేత్వా అవజాననపటిజాననాకారం దస్సేన్తో ఆహ ‘‘యో పనా’’తిఆది. యో పన వదతీతి సమ్బన్ధో. ఏసేవాతి ఏసో ఏవ, అవజాననపటిజాననభిక్ఖూతి అత్థో.

౩౭౫. నీలాదివణ్ణావణ్ణవసేనాతి నీలాదివణ్ణవసేన చ ఆరోగ్యత్థాదిఅవణ్ణవసేన చ. సఞ్చరిత్తం యస్మా అనేన సిక్ఖాపదేన ధనం అనుపదీయతి, తస్మా ధనమనుప్పదానన్తి వుచ్చతి. పుబ్బపయోగోతి పుబ్బే పయుజ్జితబ్బో.

అగతిఅగన్తబ్బవణ్ణనా

౩౭౯. బహుజనఅహితాయ పటిపన్నో హోతీతి పాళిం విత్థారేన్తో ఆహ ‘‘వినయధరేన హీ’’తిఆది. తత్థ వినయధరేనాతి అనువిజ్జకేన, వినిచ్ఛితేతి సమ్బన్ధో. ఓవాదూపజీవినియోతి భిక్ఖూనం ఓవాదం ఉపనిస్సాయ జీవినియో. ఉపాసకాపీతి రతనత్తయం పటిస్సరణన్తి ఉపాసకాపి. దాయకాపీతి భిక్ఖూనం పచ్చయదాయకాపి. తేసన్తి ఉపాసకాదీనం. తథేవాతి యథా ఉపాసకాదయో ద్విధా భిజ్జన్తి, తథేవ. తతోతి ఆరక్ఖదేవతాహి పరన్తి సమ్బన్ధో. తేనాతి ద్విధాకారణేన.

౩౮౨. గహననిస్సితోతి ఏత్థ గహనసద్దో దిట్ఠిపరియాయోతి ఆహ ‘‘మిచ్ఛాదిట్ఠిఅన్తగ్గాహికదిట్ఠిసఙ్ఖాతం గహన’’న్తి.

౩౯౩. తస్స అవజానన్తోతి ఏత్థ ‘‘తస్సా’’తి పదం ‘‘వచన’’న్తి పాఠసేసేన సమ్బన్ధితబ్బన్తి ఆహ ‘‘తస్స వచన’’న్తి. తస్సాతి నవకస్స. తన్తి నవకం.

౩౯౪. ‘‘యంఅత్థాయా’’తి ఏసో సద్దో సమాసోతి ఆహ ‘‘యదత్థాయా’’తి. ‘‘తం అత్థ’’న్తి ఏసో సద్దో లిఙ్గవిపల్లాసోతి ఆహ ‘‘సో అత్థో’’తి. అత్థసద్దో హి పుల్లిఙ్గో, పాళియం న పరిహాపేతబ్బన్తి ఏత్థాపి లిఙ్గవిపల్లాసో వేదితబ్బో. సబ్బత్థాతి సబ్బస్మిం మహాసఙ్గామే.

ఇతి మహాసఙ్గామవణ్ణనాయ యోజనా సమత్తా.