౧౧. పఞ్చసతికక్ఖన్ధకం

౧. ఖుద్దానుఖుద్దకసిక్ఖాపదకథా

౪౪౧. పఞ్చసతికక్ఖన్ధకే ‘‘చత్తారి…పే… ఖుద్దకానీ’’తి ఏవమాది వుత్తన్తి సమ్బన్ధో. పరియాయేనాతి కారణేన. ధూమకాలికన్తి ఏత్థ ధూమస్స కాలో ధూమకాలో, ధూమస్స ఉట్ఠితకాలోతి అత్థో. సో ఏతస్సత్థీతి ధూమకాలికం, సిక్ఖాపదపఞ్ఞత్తం. ఇతి ఇమమత్థం దస్సేన్తో ఆహ ‘‘యావా’’తిఆది.

౪౪౩. ఇదన్తి ‘‘కతమాని పన భన్తే ఖుద్దానుఖుద్దకాని సిక్ఖాపదానీ’’తి అపుచ్ఛనం. ‘‘తయా’’తి ఇమినా ఇదం తేతి ఏత్థ తేసద్దస్స ‘‘తుయ్హం, తవా’’తి అత్థే పటిక్ఖిపతి. ఆపత్తిన్తి దుక్కటాపత్తిం. హీతి సచ్చం, యస్మా వా. తేతి థేరా. ‘‘సఙ్ఘో…పే… న సముచ్ఛిన్దతీ’’తి ఏతం వచనం అనుస్సావితన్తి యోజనా. ‘‘దేసేహి తం ఆవుసో దుక్కట’’న్తి ఇదమ్పి చ వుత్తన్తి సమ్బన్ధో. థేరో పనాతి ఆనన్దత్థేరో పన ఆహాతి సమ్బన్ధో. తత్థాతి అపుచ్ఛనే. యథాతి యేనాకారేన. చతూసు ఠానేసూతి ‘‘భగవతో వస్సికసాటికం అక్కమిత్వా సిబ్బేసీ’’తిఆదీసు చతూసు ఠానేసు. ఏత్థాతి పఞ్చసతికక్ఖన్ధకే.

ఇతి పఞ్చసతికక్ఖన్ధకవణ్ణనాయ యోజనా సమత్తా.