౫. ఆపత్తియా అదస్సనే ఉక్ఖేపనీయకమ్మకథా

౪౬. సంసథాతి ఏత్థ సంసధాతుయా కథనత్థం దస్సేన్తో ఆహ ‘‘ఆరోచేథా’’తి. తుమ్హే సంసథ, కథేథాతి అత్థో.

౫౦. భణ్డనకారకో హోతీతిఆది కారణూపచారవసేన వుత్తోతి ఆహ ‘‘భణ్డనాదిపచ్చయా’’తిఆది. భణ్డనకారకాది కారణం, తేన ఆపన్నా ఆపత్తి ఫలం, తస్సా అదస్సనే ఉక్ఖేపనీయకమ్మం కాతబ్బన్తి అధిప్పాయో. తస్సాతి ఆపత్తియా.

౫౧. ఏత్థాతి ఉక్ఖేపనీయకమ్మే. తత్థాతి తేచత్తాలీసవత్తేసు. అనుద్ధంసేతబ్బోతి ఏత్థ ధంసధాతుయా గత్యత్థం పటిక్ఖిపన్తో ఆహ ‘‘న చోదేతబ్బో’’తి. ‘‘రజోనుద్ధంసతీ’’తిఆదీసు (బు. వం. ౨.౧౦౧) హి ధంసధాతు గత్యత్థే వత్తతి. ‘‘న భిక్ఖు భిక్ఖూహీ’’తి ఏత్థ సోయేవ భిక్ఖు తేహేవ భిక్ఖూహీతి అత్థం నివారేన్తో ఆహ ‘‘అఞ్ఞో భిక్ఖు అఞ్ఞేహి భిక్ఖూహీ’’తి. న గిహిద్ధజోతి ఏత్థ గిహీనం ధజో గిహిద్ధజోతి వుత్తే ఓదాతవత్థాదీనీతి ఆహ ‘‘ఓదాతవత్థానీ’’తిఆది. న తిత్థియాదిపదత్తయన్తి ‘‘న తిత్థియా సేవితబ్బా, భిక్ఖూ సేవితబ్బా, భిక్ఖుసిక్ఖాయ సిక్ఖితబ్బ’’న్తి పదానం తయం. ‘‘న అపసాదేతబ్బో’’తి ఇమినా న ఆసాదేతబ్బోతి ఏత్థ ఆపుబ్బసదధాతుయా అపపుబ్బసదధాతుయా సమానభావం దస్సేతి. ‘‘అన్తో వా బహి వాతి’’ ఏత్థ కస్స అన్తో వా బహి వాతి ఆహ ‘‘విహారస్సా’’తి. సేసం సబ్బంవత్తన్తి యోజనా. ఇమినాతి ఆపత్తియా అదస్సనే ఉక్ఖేపనీయకమ్మేన.

౬౫. తస్సాతి ఆపత్తియా. ఇధాతి పాపికాయ దిట్ఠియా అప్పటినిస్సగ్గే కతే ఉక్ఖేపనీయకమ్మే. ఆపత్తిఅదస్సనాదీసు ఉద్ధరిత్వా ఖిపీయతి అపనీయతి అనేన వినయకమ్మేనాతి ఉక్ఖేపనీయం, తమేవ కమ్మం ఉక్ఖేపనీయకమ్మం.

ఇతి కమ్మక్ఖన్ధకవణ్ణనాయ యోజనా సమత్తా.