౧౬౭. సత్థకమ్మపటిక్ఖేపకథా

౨౭౯. దుక్ఖేన రుపతీతి దురోపయోతి దస్సేన్తో ఆహ ‘‘దుక్ఖేన రుహతీ’’తి. సత్థకమ్మం వా వత్థికమ్మం వాతి ఏత్థ సత్థేన కాతబ్బం కమ్మం సత్థకమ్మం, వత్థిపీళనం కాతబ్బం కమ్మం వత్థికమ్మన్తి వచనత్థం దస్సేన్తో ఆహ ‘‘యథా పటిచ్ఛన్నే’’తిఆది. ‘‘సూచియా వా’’తిఆదినా సత్థకమ్మన్తి ఏత్థ ‘‘సత్థ’’న్తి పదం ఉపలక్ఖణమత్తన్తి దస్సేతి. ‘‘సత్థేన వా’’తి పదం ‘‘ఛిన్దనం వా ఫాలనం వా’’తిపదేహి యోజేతబ్బం. ‘‘సూచియా వా కణ్టకేన వా సత్తికాయ వా’’తిపదాని ‘‘విజ్ఝనం వా’’తి పదేన యోజేతబ్బాని. ‘‘పాసాణసక్ఖలికాయ వా నఖేన వా’’తి పదాని ‘‘లేఖనం వా’’తి పదేన యోజేతబ్బాని. ఏతన్తి సత్థేన ఛిన్దనాదికమ్మం. ఏత్థ చాతి సత్థకమ్మవత్థికమ్మేసు. తత్థ పనాతి సమ్బాధే పన. తేనాతి ఖారాదినా. వచ్చమగ్గే యాయ భేసజ్జమక్ఖితాదానవట్టియా ఖారకమ్మం వా కరోన్తి, యాయ వేళునాళికాయ తేలం వా పవేసేన్తి, సా భేసజ్జమక్ఖితాదానవట్టి వా సా వేళునాళికా వా వట్టతియేవాతి యోజనా.

౨౮౦. తం దివసన్తి తస్మిం దివసే. కిఞ్చి సత్థన్తి యోజనా. ఇమాయాతి సుప్పియాయ అఞ్ఞం కిఞ్చి అదేయ్యం కిమ్పి భవిస్సతీతి యోజనా. యత్ర నామాతి ఏత్థ త్రపచ్చయో కారణత్థే హోతీతి ఆహ ‘‘యస్మా నామా’’తి. ‘‘వీమంసీ’’తి ఇమినా పటివేక్ఖీతి ఏత్థ పటిఅవపుబ్బో ఇక్ఖధాతు వీమంసనత్థోతి దస్సేతి. అసుకమంసన్తి అసుకం మంసం, అసుకస్స వా సత్తస్స మంసం.