౧౪౩. వత్థుట్ఠపనాదికథా

౨౩౯. చోరా అగమంసు కిరాతి సమ్బన్ధో. పోక్ఖరణితో నీహరిత్వాతి సమ్బన్ధో. సోతి భిక్ఖు, ఏవమాహాతి సమ్బన్ధో. వుత్థేనాతి వసన్తేన, యేన కేనచి కతన్తి సమ్బన్ధో. తం పుగ్గలన్తి వత్థుకతం తం పుగ్గలం. ఏత్థాతి ‘‘వత్థుం ఠపేత్వా సఙ్ఘో పవారేయ్యా’’తి పాఠే. ఇమినా వత్థునా అపదిసాహీతి సమ్బన్ధో. నన్తి పుగ్గలం. అనువిజ్జిత్వాతి అనుయుఞ్జిత్వా, పుచ్ఛిత్వాతి అత్థో.

ఏకో భిక్ఖు పూజేసి, పివీతి సమ్బన్ధో. తస్సాతి భిక్ఖుస్స. తదనురూపోతి తేసం పూజనపివనానం అనురూపో. సోతి చోదకో భిక్ఖు. తం గన్ధన్తి తం సరీరగన్ధం. యం పుగ్గలన్తి యోజనా. ఠపేసీతి పవారణాయ ఠపేసి. అయమస్సాతి అయం దోసో అస్స పుగ్గలస్స.

ఇదానేవ నన్తి ఏత్థ ‘‘న’’న్తి పదం ‘‘పుగ్గల’’న్తి పదేన యోజేతబ్బం. నం పుగ్గలన్తి హి అత్థో. ఉభయన్తి వత్థుఞ్చ పుగ్గలఞ్చాతి ఉభయం. కల్లం వచనాయాతి యుత్తం కథేతుం. కస్మా కల్లం వచనాయాతి యోజనా. పవారణతో పుబ్బే, పచ్ఛా చాతి సమ్బన్ధో. ఇతి తస్మా కల్లం వచనాయాతి యోజనా. ఇదఞ్హి ఉభయన్తి వత్థుపుగ్గలసఙ్ఖాతం ఇదమేవ ఉభయం. పవారణాయ పుబ్బేతి యోజనా. ఉక్కోటేన్తస్సాతి చాలేన్తస్స.