౧౦౯. సత్తాహకరణీయానుజాననకథా

౧౮౭. సత్తాహకరణీయేసు ఏవం వినిచ్ఛయో వేదితబ్బోతి యోజనా. ‘‘సత్తాహకరణీయేనా’’తి పదస్స సత్తమీసమాసఞ్చ అనీయసద్దస్స కమ్మత్థఞ్చ దస్సేన్తో ఆహ ‘‘సత్తాహబ్భన్తరే యం కత్తబ్బ’’న్తి. తత్థ ‘‘సత్తాహబ్భన్తరే’’తి ఇమినా సత్తమీసమాసం దస్సేతి, ‘‘కత్తబ్బ’’న్తి ఇమినా కమ్మత్థం. ‘‘సత్తాహబ్భన్తరే’’తి ఇమినా సత్తాహస్స అబ్భన్తరం సత్తాహన్తి ఉత్తరపదలోపం దస్సేతి. పహితే గన్తున్తి ఏత్థ పహితేసద్దస్స కత్తుకమ్మాని దస్సేతుం వుత్తం ‘‘భిక్ఖుఆదీహి దూతే’’తి. తత్థ ‘‘భిక్ఖుఆదీహీ’’తి ఇమినా కత్తారం దస్సేతి, ‘‘దూతే’’తి ఇమినా కమ్మం. సత్తాహన్తి ఏత్థ ఉత్తరపదలోపఞ్చ భుమ్మత్థే ఉపయోగవచనఞ్చ దస్సేన్తో ఆహ ‘‘అన్తోసత్తాహేయేవా’’తి. తత్థేవాతి తస్మిం పహితట్ఠానేయేవ. ‘‘న ఉట్ఠాపేతబ్బో’’తి ఇమినా ‘‘సత్తాహేయేవా’’తి ఏత్థ ఏవసద్దస్స ఫలం దస్సేతి.

౧౮౯. రసో ఏతస్మిం అత్థీతి రసవతీతి వుత్తే భత్తగేహం గహేతబ్బన్తి ఆహ ‘‘భత్తగేహం వుచ్చతీ’’తి. భత్తగేహన్తి భత్తపచనగేహం. పురాయం సుత్తన్తోతి ఏత్థ పురా అయన్తి పదచ్ఛేదం కత్వా పురాసద్దో యావపరియాయోతి ఆహ ‘‘యావ అయం సుత్తన్తో’’తి. న పలుజ్జతీతి ఏత్థ లుజధాతు వినాసత్థోతి ఆహ ‘‘న వినస్సతీ’’తి. పరిసఙ్ఖతన్తి పరిసఙ్ఖరితబ్బం. సబ్బత్థాతి సబ్బేసు పహితేసు. ఇమినావ కప్పియవచనేనాతి ఇమినా ఏవ కప్పియేన తివాక్యసఙ్ఖాతేన వచనేన. ఏతేసన్తి ఏతేసం తిణ్ణం వాక్యానం. వేవచనేనాతి ‘‘యఞ్ఞఞ్చ యజితుం, సుత్తఞ్చ ఉగ్గణ్హితుం, సమణే చ దస్సితు’’న్తి పరియాయేన. సత్తసూతి ఉపాసక ఉపాసిక భిక్ఖుభిక్ఖునీ సిక్ఖమాన సామణేర సామణేరీ సఙ్ఖాతాసు సత్తసు.