౯౨. ఆపత్తిపటికమ్మవిధికథా

౧౬౯. భగవతా…పే… కాతబ్బోతి ఇదం వేదితబ్బన్తి సమ్బన్ధో. ‘‘యస్స సియా ఆపత్తీతిఆదివచనేనేవ చా’’తిఆదిహేతుత్తయేన ‘‘న సాపత్తికేన ఉపోసథో కాతబ్బో’’తి యథారుతం అపఞ్ఞత్తమ్పి అత్థతో సిద్ధమేవాతి దస్సేతి. హేతుత్తయం ‘‘వేదితబ్బ’’న్తి పదేన యోజేతబ్బం. థుల్లచ్చయాదీసూతి ఆదిసద్దేన పాచిత్తియపాటిదేసనీయదుక్కటదుబ్భాసితాపత్తియో సఙ్గణ్హాతి. ‘‘తం పటిదేసేమీ’’తి ఇదం సువుత్తమేవ హోతీతి సమ్బన్ధో. తన్తి ఆపత్తిం. తుమ్హమూలేతి తుమ్హం సన్తికే. నిగ్గహితలోపఞ్హి వాక్యమేవ, న సమాసో. ‘‘తుమ్హ’’ ఇతి చ ‘‘తుయ్హ’’ ఇతి చ నవకత్థేరానం వత్తబ్బాకారదస్సనమత్తమేవ, న ఇచ్ఛితత్థవిపత్తిదస్సనం. వుత్తమ్పీతి పిసద్దేన న కేవలం పాళినయేనేవ సువుత్తం, ఇమినా నయేనపి సువుత్తన్తి దస్సేతి. ‘‘పస్ససీ’’తి ఇదఞ్చ వత్తబ్బన్తి సమ్బన్ధో. వత్తబ్బాకారం పన సువిఞ్ఞేయ్యం. ‘‘ఆమ పస్సామీ’’తి ఇదం పన సువుత్తమేవ హోతీతి సమ్బన్ధో. వుత్తమ్పీతి పిసద్దో పాళినయం సమ్పిణ్డేతి. ఆయతిం సంవరేయ్యాసీతి ఏత్థ పన వత్తబ్బోతి సమ్బన్ధో. గరూసు బహువచనస్స కత్తబ్బత్తా వుత్తం ‘‘సంవరేయ్యాథా’’తి. ఏవం వుత్తేన ఆపత్తిదేసకేనాతి సమ్బన్ధో.

తత్రాతి ‘‘యదా నిబ్బేమతికో’’తి పాఠే. సూరియే మేఘచ్ఛన్నే సతీతి యోజనా. తేన భిక్ఖునా వత్తబ్బన్తి సమ్బన్ధో, వత్థుం కిత్తేత్వాతి భోజనసఙ్ఖాతం వత్థుం కిత్తేత్వా. తాతి ఆపత్తియో.

సభాగా ఆపత్తీతి ఏత్థ ద్వీసు వత్థుసభాగఆపత్తిసభాగాసు వత్థుసభాగావ అధిప్పేతాతి దస్సేన్తో ఆహ ‘‘యం ద్వేపి జనా’’తిఆది. యం ఆపత్తిన్తి సమ్బన్ధో. సమానో భాగో ఏతాసన్తి సభాగా. దేసేతుం వట్టతీతి ఆపత్తిసభాగాపి వత్థువిసభాగత్తా దేసేతుం వట్టతి. సుదేసితావాతి ఆపత్తితో భిక్ఖు వుట్ఠాతియేవాతి అధిప్పాయో. అఞ్ఞం దుక్కటన్తి సమ్బన్ధో. పనసద్దో గరహత్థజోతకో సుదేసితాయ గరహాకారేన పవత్తత్తా. కిఞ్చాపి సుదేసితావ, పన తథాపీతి యోజనా. తన్తి దుక్కటం. నానావత్థుకన్తి దేసనాపటిగ్గహణవసేన నానావత్థుకం.

౧౭౦. సభాగోయేవ వత్తబ్బో, న విసభాగో. హీతి సచ్చం, యస్మా వా. తస్సాతి విసభాగస్స. ఇతోతి సఙ్ఘసన్నిపాతతో.