౮౩. పాతిమోక్ఖుద్దేసకఅజ్ఝేసనాదికథా

౧౫౫. నవవిధఞ్చాతి దివసవసేన తివిధం, కారకవసేన తివిధం, కత్తబ్బాకారవసేన తివిధఞ్చాతి నవకోట్ఠాసఞ్చ, నవపకారఞ్చ వా. చతుబ్బిధన్తి ‘‘అధమ్మేన వగ్గ’’న్తిఆదికం చతుబ్బిధం. దువిధన్తి భిక్ఖుభిక్ఖునీవసేన దువిధం. నవవిధన్తి భిక్ఖుపాతిమోక్ఖే పఞ్చవిధం, భిక్ఖునిపాతిమోక్ఖే చతుబ్బిధన్తి నవవిధం. ఏత్థాతి ‘‘యో తత్థ భిక్ఖు బ్యత్తో పటిబలో’’తి పాఠే. సువిసదాతి సుట్ఠు బ్యత్తా, సుద్ధా వా. ఏత్తకమ్పీతి పిసద్దో గరహాయం, అధికే కా నామ కథాతి దస్సేతి.

సామన్తా ఆవాసాతి ఏత్థ ఉపయోగత్థే నిస్సక్కవచనన్తి ఆహ ‘‘సామన్తం ఆవాస’’న్తి. యో సక్కోతీతి బహూసు నవేసు యో సక్కోతి.