౫౫. అనుపజ్ఝాయకాదివత్థుకథా

౧౧౭. తేన ఖో పన సమయేనాతి ఏత్థ తసద్దస్స అనియమనిద్దేసభావం దస్సేన్తో ఆహ ‘‘యేన సమయేనా’’తి. సిక్ఖాపదం అపఞ్ఞత్తం హోతీతి ‘‘న భిక్ఖవే అనుపజ్ఝాయకో ఉపసమ్పాదేతబ్బో’’తి సిక్ఖాపదం అపఞ్ఞత్తం హోతి. ‘‘ఉపజ్ఝాయవిరహిత’’న్తి ఇమినా అనుపజ్ఝాయకన్తి ఏత్థ అకారస్స విరహత్థం దస్సేతి. ఉపజ్ఝాయవిరహితం ఉపసమ్పదాపేక్ఖన్తి సమ్బన్ధో. ‘‘ఏవ’’న్తిఆదినా దోసం దస్సేతి. ఉపజ్ఝం అగాహాపేత్వాతి ‘‘ఉపజ్ఝాయో మే భన్తే హోహీ’’తి (మహావ. ౬౫; మహావ. అట్ఠ. ౬౪) ఉపజ్ఝం అగాహాపేత్వా. ఉపసమ్పాదేన్తస్స కారకసఙ్ఘస్సాతి యోజనా. కమ్మం పనాతి ఉపసమ్పదకమ్మం పన. ‘‘ఏసేవ నయో’’తి ఇమినా ఉపసమ్పాదేన్తస్స ఆపత్తి, కమ్మం పన న కుప్పతీతి వచనం అతిదిసతి.