౫౬. అపత్తకాదివత్థుకథా

౧౧౮. యో పిణ్డో హత్థేసు లబ్భతీతి యోజనా. తదత్థాయాతి తస్స పిణ్డస్స అత్థాయ. సేయ్యథాపి తిత్థియాతి ఏత్థ సేయ్యథాపిసద్దో ఉపమత్థో, తిత్థియసద్దో ఆజీవకనామకే తిత్థియే హోతీతి దస్సేన్తో ఆహ ‘‘యథాపి ఆజీవకనామకా తిత్థియా’’తి. తస్మా ఆజీవకసఙ్ఖాతే తిత్థియే ఉపమం కత్వా ఉజ్ఝాయన్తీతి ఆహ ‘‘సూపబ్యఞ్జనేహీ’’తిఆది. హీతి సచ్చం, యస్మా వా. తేతి ఆజీవకా. కమ్మం పన న కుప్పతీతి పత్తచీవరేసు అసన్తేసుపి కమ్మవాచాయ ‘‘పరిపుణ్ణస్స పత్తచీవర’’న్తి పరికిత్తితత్తా కమ్మం న కుప్పతీతి అధిప్పాయో.

యాచితకేనాతి ఏత్థ యాచితో హుత్వా గహితో యాచితకోతి దస్సేన్తో ఆహ ‘‘యాచిత్వా గహితేనా’’తి. ‘‘ఈదిసేన హీ’’తిఆదినా దోసం దస్సేతి. తస్మాతి యస్మా ఆపత్తి హోతి, తస్మా. తస్సాతి ఉపసమ్పదాపేక్ఖస్స. నిరపేక్ఖేహి ఆచరియుపజ్ఝాయాదీహీతి యోజనా. నిస్సజ్జిత్వాతి బ్రహ్మదేయ్యేన నిస్సజ్జిత్వా. అనధిట్ఠానుపగానం పత్తచీవరానం అపత్తచీవరత్తా వుత్తం ‘‘అధిట్ఠానుపగం పత్తచీవర’’న్తి. పణ్డుపలాసన్తి సమణుద్దేసభావాపేక్ఖం. సో హి రూళ్హివసేన పణ్డుపలాసోతి వుచ్చతి. అథ వా యథా పణ్డుపలాసో న హరితో, నాపి సుక్ఖో హోతి, ఏవం సోపి పబ్బజాపేక్ఖో న గిహీ హోతి, నాపి సామణేరో, తస్మా సమణుద్దేసభావాపేక్ఖో ‘‘పణ్డుపలాసో’’తి వుచ్చతి.

వసన్తస్స పణ్డుపలాసస్సాతి సమ్బన్ధో. అనామట్ఠపిణ్డపాతన్తి భిక్ఖూహి అనామసితబ్బగ్గం పిణ్డపాతం. సామణేరభాగసమకోతి సామణేరేహి లద్ధేన భాగేన సమం పవత్తో. అస్సాతి పణ్డుపలాసస్స. సామణేరస్స సబ్బం పటిజగ్గనకమ్మం కాతుం వట్టతి వియ, అస్స కాతుం వట్టతీతి యోజనా.