౪౮. తిత్థియపక్కన్తకకథా

౧౧౦. పక్కమతీతి పక్కన్తో, ‘‘పవిట్ఠో’’తి ఇమినా కముధాతుయా పదవిక్ఖేపత్థం దస్సేతి, ఇచ్ఛాకన్తిఅత్థే నివత్తేతి. సోతి తిత్థియపక్కన్తకో. తత్రాతి తిత్థియపక్కన్తకే. ఉపసమ్పన్నో భిక్ఖు గచ్ఛతీతి సమ్బన్ధో. తేసన్తి తిత్థియానం. ‘‘తిత్థియో భవిస్సామీ’’తి పుబ్బేవ లద్ధిగహితత్తా వుత్తం ‘‘లిఙ్గే ఆదిన్నమత్తే’’తి. కుసచీరాదీనీతి ఏత్థ కుసో వుచ్చతి సలాకా. చీరోతి పన్తి, ఆవలీతి అత్థో. కుసే రజ్జునా ఆవునిత్వా కతో చీరో కుసచీరో, సో ఆది యేసం తానీతి కుసచీరాదీని. ఆదిసద్దేన ఫలకచీరాదయో సఙ్గణ్హాతి. కుసతిణేహి కతో చీరో కుసచీరోతిపి వదన్తి. నగ్గోతి అచేలకో. ఆజీవకోతి అచేలకవతమాదాయ జీవతీతి ఆజీవకో. తేసన్తి ఆజీవకానం. ఓవదితో హుత్వాతి సమ్బన్ధో.

కిన్తి కిం వతం. లుఞ్చాపేతీతి అపనయాపేతి. మోరపిఞ్ఛాదీనీతి ఏత్థ పిఞ్ఛం వుచ్చతి పక్ఖో. సో హి పిఞ్ఛతి ఆకాసే గచ్ఛతి అనేనాతి పిఞ్ఛన్తి వుచ్చతి. పిఛి గతియన్తి ధాతుపాఠో. మోరస్స పిఞ్ఛం మోరపిఞ్ఛం, తం ఆది యేసం తానీతి మోరపిఞ్ఛాదీని. ఆదిసద్దేన ఉలూకపిఞ్ఛాదయో సఙ్గణ్హాతి. యావ న సమ్పటిచ్ఛతీతి యావ లద్ధిం న సమ్పటిచ్ఛతి. నన్తి వీమంసమానం భిక్ఖుం. లద్ధీతి తిత్థియలద్ధి. రక్ఖతీతి తిత్థియపక్కన్తకతో రక్ఖతి. లద్ధియా అభావేన తిత్థియపక్కన్తకో న హోతీతి అధిప్పాయో. అచ్ఛిద్దచీవరోతి ఏత్థ ఆకారో కోధత్థో, అడ్డత్థో వా హోతి, ఛిద్దసద్దో దూసనత్థో హోతి. తస్మా ఆకోధేన అడ్డేన వా ఛిద్దో దూసితోతి అచ్ఛిద్దోతి అత్థో దట్ఠబ్బో. ‘‘అచ్ఛిన్నో’’తిపి పాఠో. అచ్ఛిద్దం చీవరమేతస్సాతి అచ్ఛిద్దచీవరో. తిత్థాయతనన్తి తిత్థీనం నివాసట్ఠానం, తిత్థియానం ఉపస్సయన్తి అత్థో.