౪౨. సిక్ఖాపదదణ్డకమ్మవత్థుకథా

౧౦౬. నాసనవత్థూతి లిఙ్గనాసనాయ అధిట్ఠానం, కారణన్తి వుత్తం హోతి. పచ్ఛిమానం పఞ్చన్నన్తి యోజనా. దణ్డకమ్మవత్థూతి దణ్డకమ్మస్స కారణం.

౧౦౭. అప్పతిస్సాతి ఏత్థ భిక్ఖూనం వచనస్స పటిముఖం ఆదరేన అసవనం భిక్ఖూ జేట్ఠకట్ఠానే న ఠపేన్తి నామాతి దస్సేన్తో ఆహ ‘‘భిక్ఖూ జేట్ఠకట్ఠానే’’తిఆది. ‘‘సమానజీవికా’’తి ఇమినా అసభాగవుత్తికాతి ఏత్థ సభాగసద్దో సమానసద్దపరియాయో, వుత్తిసద్దో జీవికపరియాయోతి దస్సేతి. పరిసక్కతీతి ఏత్థ సక్క గతియన్తిధాతుపాఠేసు (సద్దనీతిధాతుమాలాయం ౧౬ ళకారన్తధాతు) వుత్తత్తా పరిపుబ్బో సక్కసద్దో గత్యత్థోతి ఆహ ‘‘పరక్కమతీ’’తి. కిన్తీతి కిమేవ. ఇతిసద్దో హేత్థ ఏవసద్దత్థో, కేన ఏవ ఉపాయేనాతి హి అత్థో. అక్కోసతి చేవాతి జాతిఆదీహి అక్కోసతి చేవ. భేదేతీతి భేదాపేతి. ఆవరణం కాతున్తి ఏత్థ ఆవరణసద్దో నివారణసద్దవేవచనోతి ఆహ ‘‘నివారణం కాతు’’న్తి. యత్థాతి యస్మిం పరివేణే, సేనాసనే వా. వస్సగ్గేనాతి వస్సగణనాయ. (తస్సాతి పరివేణసేనాసనస్స. ఉపచారేతి ఆసన్నే). ముఖద్వారికన్తి ముఖసఙ్ఖాతేన ద్వారేన అజ్ఝోహరితబ్బం. ‘‘వదతోపీ’’తి ఇమినా వచీపయోగేన దుక్కటాపత్తిం దస్సేతి, ‘‘నిక్ఖిపతోపీ’’తి ఇమినా కాయపయోగేన. అనాచారస్సాతి దణ్డకమ్మే అనాచారస్స. ఏత్తకే నామ దణ్డకమ్మేతి ఏత్తకే నామ ఉదకాహరాపనాదిసఙ్ఖాతే దణ్డకమ్మే. ఇదన్తి యాగుభత్తాదిం. లచ్ఛసీతి లభిస్ససి. ‘‘ఏత్తకే నామ దణ్డకమ్మే’’తి వుత్తవచనస్స యుత్తిం దస్సేన్తో ఆహ ‘‘భగవతా హీ’’తిఆది. దణ్డకమ్మన్తి దణ్డేన్తి దమేన్తి ఏతేనాతి దణ్డో, సోయేవ కత్తబ్బత్తా కమ్మన్తి దణ్డకమ్మం ఆవరణాది. అపరాధానురూపన్తి వీతిక్కమస్స అపరాధస్స అనురూపం. తమ్పీతి ఉదకదారువాలికాదిఆహరాపణమ్పి. తఞ్చ ఖోతి తఞ్చ కరణం. ఓరమిస్సతీతి కాయేన ఓరమిస్సతి. విరమిస్సతీతి వాచాయ విరమిస్సతి. ఉణ్హపాసాణే వాతిఆదీసు వాసద్దేన అఞ్ఞానిపి అత్తతాపనపరితాపనాదీని కమ్మాని సఙ్గణ్హాతి.