౪౩. అనాపుచ్ఛావరణవత్థుఆదికథా

౧౦౮. ఉపజ్ఝాయం అనాపుచ్ఛాతి ఏత్థ ఉపజ్ఝాయం అనాపుచ్ఛిత్వా. సబ్బథా కిం న కాతబ్బన్తి ఆహ ‘‘తుమ్హాక’’న్తిఆది. దణ్డకమ్మమస్సాతి దణ్డకమ్మం అస్స. అస్సాతి సామణేరస్స. సద్ధిం ఉపజ్ఝాయేన విహరన్తీతి సద్ధివిహారికా. నిస్సయాచరియాదీనం అన్తే సమీపే వసన్తీతి అన్తేవాసికా, ఉపసమ్పన్నాయేవ.

అపలాళేన్తీతి ఏత్థ లళ ఉపసేవాయన్తి ధాతుపాఠేసు వుత్తత్తా (సద్దనీతిధాతుమాలాయం ౧౮ ళకారన్తధాతు) థేరే లళతో ఉపసేవతో అపగమేన్తీతి అత్థో దట్ఠబ్బో. ఇధ పన అధిప్పాయత్థం దస్సేన్తో ఆహ ‘‘తుమ్హాక’’న్తిఆది. అపలాళేతబ్బాతి అఞ్ఞం లళతో ఉపసేవతో అపగమేతబ్బా. పరిసభూతే సామణేరూపసమ్పన్నేతి యోజనా. ఆదీనవన్తి దుస్సీలం నిస్సాయ వసనస్స దోసం. న్హాయితుం ఆగతేన తయా గూథమక్ఖనం కతం వియ దుస్సీలం నిస్సాయ విహరన్తేన దుస్సీలం కతన్తి యోజనా. ‘‘దుస్సీల’’న్తి పదం పురిమపచ్ఛిమపదాపేక్ఖం, తస్మా ద్విన్నం పదానం మజ్ఝే వుత్తం. తత్థ పురిమపదాపేక్ఖకాలే వుత్తకమ్మం, పచ్ఛిమపదాపేక్ఖకాలే అవుత్తకమ్మం. సోతి సామణేరూపసమ్పన్నో. ఉపజ్ఝాయం వాతి సామణేరం సన్ధాయ వుత్తం. నిస్సయం వాతి ఉపసమ్పన్నం సన్ధాయ వుత్తం.

తీసు నాసనాసూతి సంవాసలిఙ్గదణ్డకమ్మనాసనసఙ్ఖాతాసు తీసు నాసనాసు. యోతి సామణేరో. నానాఆపత్తియోతి పారాజికథుల్లచ్చయ పాచిత్తియాపత్తియో. హీతి సచ్చం, యస్మా వా. కున్థకిపిల్లికమ్పీతి ఏత్థ పాణఖాదకేహి సత్తేహి కుథియతి హింసియతీతి కున్థో, కుం పథవిం వా ధారేతీతి కున్ధో.

కిమియేవ పిల్లికం పోతకం కిపిల్లికం మికారస్స లోపం కత్వా. పిల్లికసద్దో హి పోతకపరియాయో. కిమీనం, కిమీసు వా పిల్లికం కిపిల్లికం. నాసేతబ్బతంయేవాతి లిఙ్గేన నాసేతబ్బభావమేవ. తావదేవాతి తస్మిం మారణభిన్దనక్ఖణేయేవ. అస్సాతి సామణేరస్స. సేనాసనగ్గాహో చ పటిప్పస్సమ్భతీతి వస్సచ్ఛేదో హోతీతి అధిప్పాయో. ఆకిణ్ణదోసోవాతి లిఙ్గనాసనదోసేన చ దణ్డకమ్మనాసనదోసేన చ ఆకులదోసోవ. విరజ్ఝిత్వాతి విరాధేత్వా. యథానివత్థపారుతస్సేవ సామణేరస్సాతి సమ్బన్ధో. తస్మాతి సరణగమనఉపసమ్పదకమ్మవాచానం సదిసత్తా. భిక్ఖునా సమాదిన్నం వియ ఇమినాపి సమాదిన్నానేవ హోన్తీతి యోజనా. ఏవన్తి ఏవమిజ్ఝనే, సమాదిన్నే వా. దళ్హీకరణత్థన్తి సిక్ఖాపదానం దళ్హీకరణత్థం. పతిట్ఠాపనత్థన్తి సామణేరస్స పతిట్ఠాపనత్థం. లచ్ఛతీతి లభిస్సతి. సఙ్ఘేన దాతబ్బోతి సమ్బన్ధో. అపలోకేత్వాతి సఙ్ఘం ఆపుచ్ఛిత్వా. ఇమినా ఛిన్నవస్సకం దస్సేతి.

అదిన్నాదానే తిణసలాకమత్తేనాపి వత్థునా అసమణో హోతీతి యోజనా. విప్పటిపత్తియాతి వికారేన పటిపజ్జనతో. భణితేతి భణనే. జానిత్వాతి జానిత్వా ఏవ. ఏవకారో హేత్థ అజ్ఝాహరితబ్బో, తేన వుత్తం ‘‘న అజానిత్వా’’తి. యాని పఞ్చ సిక్ఖాపదానీతి యోజనా. అస్సాతి సామణేరస్స. ఠపనత్థాయాతి సిక్ఖాపదానం ఠపనత్థాయ. అయన్తి పారాజికో. విసేసోతి భిక్ఖూనం పాచిత్తియతో విసేసో.

పటిపక్ఖవసేనాతి ‘‘అనరహం అసమ్మాసమ్బుద్ధో’’తిఆదినా చ ‘‘ద్వాక్ఖాతో’’తిఆదినా చ ‘‘దుప్పటిప్పన్నో’’తిఆదినా చ పటివిరుద్ధవసేన గరహన్తో సామణేరో నివారేతబ్బోతి సమ్బన్ధో. కణ్డకనాసనాయాతి కణ్డకనామకస్స సామణేరస్స దణ్డకమ్మనాసనాయ. తం లద్ధిన్తి అవణ్ణభాసనదిట్ఠిం. అచ్చయన్తి అతిక్కమం, దోసం వా. దేసాపేతబ్బోతి ‘‘అచ్చయో మం భన్తే అచ్చగమా’’తిఆదినా దేసాపేతబ్బా. తం యుత్తన్తి ‘‘లిఙ్గనాసనాయ నాసేతబ్బో’’తి తం వచనం పతిరూపం. హీతి సచ్చం, యస్మా వా. ఇధాతి ఖన్ధకే, ‘‘సామణేరం నాసేతు’’న్తివచనే వా.

‘‘ఏసేవ నయో’’తి వుత్తవచనం పాకటం కరోన్తో ఆహ ‘‘సస్సతుచ్ఛేదానఞ్హీ’’తిఆది. అఞ్ఞతరదిట్ఠికో సామణేరోతి యోజనా. ఏత్థాతి దససు నాసనఙ్గేసు. ‘‘కామ’’న్తిపదేన పునరుత్తినిరత్థకదోసారోపనేన గరహం దస్సేతి. ‘‘పనా’’తిపదేన తేసం దోసానం పహానేన సమ్భావనం దస్సేతి. అబ్రహ్మచారిం సామణేరన్తి సమ్బన్ధో. ఉపసమ్పాదేతుం వట్టతీతి ఉపసమ్పాదనం వట్టతి. భిక్ఖునిదూసకో సామణేరోతి సమ్బన్ధో. పబ్బజ్జమ్పీతి ఏత్థ పిసద్దస్స గరహత్థభావం దస్సేతుం వుత్తం ‘‘పగేవ ఉపసమ్పద’’న్తి. ఏతమత్థన్తి ఏతాదిసమత్థం.