౩౩. ఇణాయికవత్థుకథా

౯౬. ఇణాయికో నామాతి ఏత్థ ఇణన్తి ఉద్ధారో. సో హి యస్మా ఏతి వుద్ధిం గచ్ఛతి, తస్మా ఇణన్తి వుచ్చతి. తం గణ్హాతి, ధారేతీతి వా ఇణాయికో. యం వాతి జనం వా ఆఠపేత్వాతి సమ్బన్ధో. ఆఠపేత్వాతి చ పేసనత్థాయ ధనసామికస్స సన్తికే ఠపేత్వాతి అత్థో. ఆకారో హి పేసనత్థవాచకో. సోపీతి పిసద్దో పురిమజనే అపేక్ఖతి. ‘‘ధారేతీ’’తి ఇమినా ఆయికపచ్చయో ధారణత్థే హోతీతి దస్సేతి. అఞ్ఞేతి మాతాపితూహి అఞ్ఞే. హీతి సచ్చం, యస్మా వా. తేతి అఞ్ఞే ఞాతకా, తం ఆఠపేతుం యస్మా న ఇస్సరా, తస్మా న ఇణాయికోతి యోజనా. ఇతరన్తి నఇణాయికతో అఞ్ఞం. అస్సాతి జనస్స. నన్తి తం జనం. తేసూతి ఞాతిసాలోహితాదీసు. తథారూపస్సాతి అత్తనో ఞాతిసాలోహితస్సాతి అత్థో. ఆరోచేతబ్బాకారం దస్సేన్తో ఆహ ‘‘సహేతుకో’’తిఆది. తత్థ సహేతుకోతి భబ్బో. సోతి ఉపట్ఠాకో. పటిపజ్జతీతి పటిదదాతి. ఏతన్తి కప్పియభణ్డం. అజానిత్వాతి ఇణాయికభావమజానిత్వా. పస్సన్తేనాతి ఇణాయికం పస్సన్తేన. ‘‘అపస్సన్తస్స గీవా న హోతీ’’తి ఇమినా పస్సిత్వా అదస్సేన్తస్స గీవా హోతీతి దస్సేతి.

పుచ్ఛియమానోపీతి ‘‘కిం త్వం ఇణాయికోసీ’’తి పుచ్ఛియమానోపి. తన్తి ఇణాయికం. తత్థాతి అఞ్ఞస్మిం దేసే. తన్తి ఇణసామికం. సోతి ఇణసామికో. అయన్తి ఇణాయికో. అయన్తి వచనా. తత్థాతి ఇణాయికస్స పబ్బాజనే. సామీచీతి అనుధమ్మతా.

నన్తి ఇణాయికం. సోతి ఇణసామికో. అస్సాతి థేరస్స. గీవా న హోతీతి సమ్బన్ధో. అచ్ఛతూతి ఆసతు ఉపవేసతూతి అత్థో. సోతి ఇణాయికో. ఈదిసోతి సహేతుకో వత్తసమ్పన్నోతి అత్థో. అతిఆరాధకోతి వత్తాచారేన థేరస్స అతితోసకో.