౧౨. ఉరువేలపాటిహారియకథా

౩౮. పరియాదియేయ్యన్తి ఏత్థ దాధాతుస్స పరీతి చ ఆతి చ ఉపసగ్గవసేన అభిభవనత్థోతి ఆహ ‘‘అభిభవేయ్య’’న్తి.

౩౯. పచ్ఛా పక్ఖిత్తాతి సఙ్గీతితో పరం పోత్థకారూళ్హేహి ఠపితాతి అత్థో.

౪౪. ‘‘ఏవం వదన్తో వియ ఓణతో’’తి ఇమినా ‘‘ఆహరహత్థో’’తిపదస్స తద్ధితభావం దస్సేతి. విత్థిణ్ణముఖత్తా మన్దం హీనం అతిముఖమేతాసన్తి వచనత్థేన అగ్గికపాలా మన్దాముఖియోతి వుచ్చన్తీతి ఆహ ‘‘అగ్గిభాజనాని వుచ్చన్తీ’’తి.

౫౧. యస్మా యో నాగదమనకాలో చిరం పతతి పవత్తతి, తస్మా సో చిరపతికోతి వుచ్చతి, తస్మా చిరపతికా పట్ఠాయ అభిప్పసన్నాతి యోజనా. ఇతి ఇమమత్థం దస్సేన్తో ఆహ ‘‘చిరకాలతో పట్ఠాయా’’తి.

౫౨. సబ్బత్థాతి సబ్బేసు ‘‘జటామిస్స’’న్తిఆదిపదేసు. ఖారికాజన్తి ఏత్థ కమణ్డలుఆదికా తాపసపరిక్ఖారా ఖారీతి వుచ్చన్తి, ఖారిసఙ్ఖాతేన భారేన పూరితో కాజో ఖారికాజోతి అత్థం ఏకదేసేన దస్సేన్తో ఆహ ‘‘ఖారిభారో’’తి.