౫. చిత్తాగారవగ్గో

౧. పఠమసిక్ఖాపద-అత్థయోజనా

౯౭౮. చిత్తాగారవగ్గస్స పఠమే రఞ్ఞో కీళనట్ఠానం అగారం రాజాగారన్తి వచనత్థం దస్సేన్తో ఆహ ‘‘రఞ్ఞో కీళనఘర’’న్తి. చిత్తం అగారం చిత్తాగారం. ఆరామన్తి నగరతో నాతిదూరఆరామోతి ఆహ ‘‘ఉపవన’’న్తి. ఉయ్యానన్తి సమ్పన్నపుప్ఫఫలతాయ ఉద్ధం ఉల్లోకేత్వా మనుస్సా యన్తి గచ్ఛన్తి ఏత్థాతి ఉయ్యానం. పోక్ఖరణిన్తి పోక్ఖరం పదుమం నేతీతి పోక్ఖరణీ. పఞ్చపీతి రాజాగారాదీని పఞ్చపి. సబ్బత్థాతి దస్సనత్థాయ గమనే చ గన్త్వా పస్సనే చాతి సబ్బేసు.

౯౮౧. ‘‘అజ్ఝారామే’’తిఆదినా ఆరామే ఠితాయ ఆరామతో బహి కతే రాజాగారాదికే పస్సన్తియాపి అనాపత్తీతి దస్సేతి. తానీతి రాజాగారాదీనీతి. పఠమం.

౨. దుతియసిక్ఖాపదం

౯౮౨. దుతియే అనుత్తానట్ఠానం నత్థీతి. దుతియం.

౩. తతియసిక్ఖాపదం

౯౮౮. తతియే యత్తకన్తి యత్తకం సుత్తన్తి సమ్బన్ధో. అఞ్ఛితన్తి కడ్ఢితం. తస్మిన్తి తత్తకే సుత్తేతి సమ్బన్ధో. తక్కమ్హీతి ఏత్థ తక్కోతి ఏకో అయోమయో సుత్తకన్తనస్స ఉపకరణవిసేసో. సో హి తకీయతి సుత్తం బన్ధీయతి ఏత్థ, ఏతేనాతి వా తక్కోతి వుచ్చతి, తస్మిం. కన్తనతోతి కన్తీయతే కప్పాసాదిభావస్స ఛిన్దీయతే కన్తనం, తతో.

౯౮౯. దసికసుత్తాదిన్తి ఏత్థ దసాతి వత్థస్సావయవో. సో హి దియ్యతి అవఖణ్డీయతీతి దసాతి వుచ్చతి, తస్సం దసాయం పవత్తం దసికం, తమేవ సుత్తం దసికసుత్తం. ఆదిసద్దేన వక్ఖమానం దుక్కన్తితసుత్తాదిం సఙ్గణ్హాతీతి. తతియం.

౪. చతుత్థసిక్ఖాపదం

౯౯౨. చతుత్థే ఆదిం కత్వాతి ధోవనాదీని ఆదిం కత్వా. ఖాదనీయాదీసూతి పూవఖాదనీయాదీసు. రూపగణనాయాతి పూవాదీనం సణ్ఠానగణనాయ.

౯౯౩. యాగుపానేత్త యాగుసఙ్ఖాతే పానే. తేసన్తి మనుస్సానం. వేయ్యావచ్చకరట్ఠానే ఠపేత్వాతి మాతాపితరో అత్తనో వేయ్యావచ్చకరట్ఠానే ఠపేత్వాతి. చతుత్థం.

౫. పఞ్చమసిక్ఖాపదం

౯౯౬. పఞ్చమే వినిచ్ఛినన్తీతి అధికరణం వినిచ్ఛినన్తీ భిక్ఖునీతి యోజనాతి. పఞ్చమం.

౬. ఛట్ఠసిక్ఖాపదం

౯౯౯. ఛట్ఠే అనుత్తానవచనం నత్థీతి.

౭. సత్తమసిక్ఖాపదం

౧౦౦౭. సత్తమే ‘‘పున పరియాయే’’తి ఏత్థ పరియాయసద్దో వారవేవచనోతి ఆహ ‘‘పున వారే’’తి. మహగ్ఘచీవరన్తి మహగ్ఘం ఆవసథచీవరన్తి. సత్తమం.

౮. అట్ఠమసిక్ఖాపదం

౧౦౦౮. అట్ఠమే అనిస్సజ్జిత్వాతి ఏత్థ బ్రహ్మదేయ్యేన న అనిస్సజ్జనం, అథ ఖో తావకాలికమేవాతి దస్సేన్తో ఆహ ‘‘రక్ఖనత్థాయా’’తిఆది.

౧౦౧౨. పటిజగ్గికన్తి రక్ఖణకం. వచీభేదన్తి ‘‘పటిజగ్గాహీ’’తి వచీభేదం. రట్ఠేతి విజితే. తఞ్హి రఠన్తి గామనిగమాదయో తిట్ఠన్తి ఏత్థాతి రట్ఠన్తి వుచ్చతీతి. అట్ఠమం.

౯. నవమసిక్ఖాపదం

౧౦౧౫. నవమే సిప్పసద్దో పచ్చేకం యోజేతబ్బో ‘‘హత్థిసిప్పఞ్చ అస్ససిప్పఞ్చ రథసిప్పఞ్చ ధనుసిప్పఞ్చ థరుసిప్పఞ్చా’’తి. తత్థ థరుసిప్పన్తి అసికీళనసిప్పం. మన్తసద్దోపి పచ్చేకం యోజేతబ్బో ‘‘ఆథబ్బణమన్తో చ ఖీలనమన్తో చ వసీకరణమన్తో చ సోసాపనమన్తో చా’’తి. తత్థ ఆథబ్బణమన్తోతి ఆథబ్బణవేదేన విహితో పరూపఘాతకరో మన్తో. ఖీలనమన్తోతి సారదారుఖీలం మన్తేన జప్పిత్వా పథవియం నిఖణిత్వా ధారణమన్తో. వసీకరణమన్తోతి మన్తేన జప్పిత్వా పరస్స ఉమ్మత్తభావమాపన్నకరణో మన్తో. సోసాపనమన్తోతి పరస్స మంసలోహితాదిసోసాపనమన్తో. అగదపయోగోతి భుసవిసస్స పయోజనం. ఆదిసద్దేన అఞ్ఞేపి పరూపఘాతకరణే సిప్పే సఙ్గణ్హాతి. యక్ఖపరిత్తన్తి యక్ఖేహి సమన్తతో తాణం. నాగమణ్డలన్తి సప్పానం పవేసననివారణత్థం మణ్డలబన్ధమన్తో. ఆదిసద్దేన విసపటిహననమన్తాదయో సఙ్గణ్హాతీతి. నవమం.

౧౦. దసమసిక్ఖాపదం

౧౦౧౮. దసమే అనుత్తానవచనం నత్థీతి. దసమం.

చిత్తాగారవగ్గో పఞ్చమో.