౬. ఆరామవగ్గో

౧. పఠమసిక్ఖాపద-అత్థయోజనా

౧౦౨౫. ఆరామవగ్గస్స పఠమే ఉపచారన్తి అపరిక్ఖిత్తస్స ఆరామస్స పరిక్ఖేపారహట్ఠానం ఉపచారం.

౧౦౨౭. ‘‘సీసానులోకికా’’తి సామఞ్ఞతో వుత్తేపి భిక్ఖునీనమేవ సీసన్తి ఆహ ‘‘భిక్ఖునీన’’న్తి. యత్థాతి యస్మిం ఠానేతి. పఠమం.

౨. దుతియసిక్ఖాపదం

౧౦౨౮. దుతియే అబ్భన్తరోతి అబ్భన్తరే పరియాపన్నో, జాతో వా. ‘‘సఙ్కామేసీ’’తి ఇమినా సంహరీతి ఏత్థ హరధాతుయా సఙ్కమనత్థం దస్సేతి. న్హాపితాతి కప్పకా. తే హి నహాపేన్తి సోచాపేన్తీతి న్హాపితాతి వుచ్చన్తి. తన్తి కాసావనివాసనన్తి. దుతియం.

౩-౪. తతియ-చతుత్థసిక్ఖాపదం

౧౦౩౬. తతియచతుత్థేసు అనుత్తానట్ఠానం నత్థీతి. తతియచతుత్థాని.

౫. పఞ్చమసిక్ఖాపదం

౧౦౪౩. పఞ్చమే ‘‘కులే మచ్ఛరో’’తి ఏత్థ మచ్ఛరనం మచ్ఛరోతి వచనత్థో కాతబ్బో. ‘‘తం కులం అస్సద్ధం అప్పసన్న’’న్తి కులస్స అవణ్ణం భాసతీతి యోజనా. ‘‘భిక్ఖునియో దుస్సీలా పాపధమ్మా’’తి భిక్ఖునీనం అవణ్ణం భాసతీతి యోజనా.

౧౦౪౫. ‘‘సన్తంయేవ ఆదీనవ’’న్తి సమ్బన్ధియా సమ్బన్ధం దస్సేతుం వుత్తం ‘‘కులస్స వా భిక్ఖునీనం వా’’తి ఇమినా ద్వీసు అఞ్ఞతరమేవ న సమ్బన్ధో హోతి, అథ ఖో ద్వయమ్పీతి దస్సేతీతి. పఞ్చమం.

౬. ఛట్ఠసిక్ఖాపదం

౧౦౪౮. ఛట్ఠే ఓవాదాయాతి ఏత్థ న యో వా సో వా ఓవాదో హోతి, అథ ఖో గరుధమ్మోయేవాతి ఆహ ‘‘గరుధమ్మత్థాయా’’తి. సహ వసతి ఏత్థ, ఏతేనాతి వా సంవాసోతి వచనత్థేన ఉపోసథపవారణా సంవాసో నామాతి ఆహ ‘‘ఉపోసథపవారణాపుచ్ఛనత్థాయా’’తి. ‘‘పుచ్ఛనత్థాయా’’తి ఇమినా ‘‘సంవాసాయా’’తి ఏత్థ ఉత్తరపదలోపభావం దస్సేతి. ఏత్థాతి భిక్ఖునివిభఙ్గే, సిక్ఖాపదే వా పాళియం వాతి. ఛట్ఠం.

౭-౯. సత్తమ-అట్ఠమ-నవమసిక్ఖాపదం

౧౦౫౩. సత్తమట్ఠమనవమేసు అనుత్తానవచనం నత్థి. కేవలం పన ‘‘ఇమిస్సాపీ’’తి పదం విసేసో, ఇమిస్సాపి పాళియాతి అత్థోతి. సత్తమట్ఠమనవమాని.

౧౦. దసమసిక్ఖాపదం

౧౦౬౨. దసమే ద్వే కాయా ఉపరిమకాయో హేట్ఠిమకాయోతి. తత్థ కటితో ఉద్ధం ఉపరిమకాయో, హేట్ఠా హేట్ఠిమకాయో. తత్థ ‘‘పసాఖే’’తి ఇదం హేట్ఠిమకాయస్స నామన్తి ఆహ ‘‘అధోకాయే’’తి. హీతి సచ్చం. తతోతి అధోకాయతో. ఇమినా పఞ్చమీబాహిరత్థసమాసం దస్సేతి. రుక్ఖస్స సాఖా పభిజ్జిత్వా గతా వియ ఉభో ఊరూ పభిజ్జిత్వా గతాతి యోజనా.

౧౦౬౫. ఫాలేహీతి ఏత్థ ఇతిసద్దో ఆద్యత్థో. తేన ‘‘ధోవా’’తిఆదీని చత్తారి పదాని సఙ్గణ్హాతి. ఆణత్తిదుక్కటానీతి హేట్ఠా వుత్తేసు అట్ఠసు దుక్కటేసు వినయదుక్కటమేవ. సేసేసూతి భిన్దనతో సేసేసు ఫాలనాదీసూతి. దసమం.

ఆరామవగ్గో ఛట్ఠో.