౪. తువట్టవగ్గో

౧. పఠమసిక్ఖాపద-అత్థయోజనా

౯౩౩. తువట్టవగ్గస్స పఠమే ‘‘తువట్ట నిపజ్జాయ’’న్తి ధాతుపాఠేసు (సద్దనీతిధాతుమాలాయం ౧౮ టకారన్తధాతు) వుత్తత్తా ‘‘తువట్టేయ్యున్తి నిపజ్జేయ్యు’’న్తి వుత్తన్తి. పఠమం.

౨. దుతియసిక్ఖాపదం

౯౩౭. దుతియే ఏకత్థరణపావురణన్తిఏత్థ ఉత్తరపదానం ద్వన్దభావం, పుబ్బపదేన చ బాహిరత్థసమాసభావం దస్సేతుం వుత్తం ‘‘ఏక’’న్తిఆది. తత్థ చేవ, చసద్దేహి ద్వన్దభావం దీపేతి, ‘‘ఏతాస’’న్తిఇమినా బాహిరత్థసమాసభావం. ఏతన్తి ‘‘ఏకత్థరణపావురణా’’తి ఏతం నామన్తి. దుతియం.

౩. తతియసిక్ఖాపదం

౯౪౧. తతియే ఉళారకులాతి జాతిసేట్ఠకులా, ఇస్సరియభోగాదీహి వా విపులకులా. గుణేహీతి సీలాదిగుణేహి. ‘‘ఉళారాతి సమ్భావితా’’తి ఇమినా ఇతిలోపతుల్యాధికరణసమాసం దస్సేతి.

‘‘అభిభూతా’’తి ఇమినా ‘‘అపకతా’’తి ఏత్థ కరధాతు సబ్బధాత్వత్థవాచీపి ఇధ అపపుబ్బత్తా విసేసతో అభిభవనత్థే వత్తతీతి దస్సేతి. ఏతాసన్తి భిక్ఖునీనం. ‘‘సఞ్ఞాపయమానా’’తి ఇమినా సఞ్ఞాపనం సఞ్ఞత్తీతి వచనత్థం దస్సేతి. హేతూదాహరణాదీహీతి ఏత్థ ఆదిసద్దేన ఉపమాదయో సఙ్గణ్హాతి. ‘‘వివిధేహి నయేహి ఞాపనా’’తి ఇమినా వివిధేహి ఞాపనం విఞ్ఞత్తీతి వచనత్థం దస్సేతి.

౯౪౩. చఙ్కమనే పదవారగణనాయ ఆపత్తియా న కారేతబ్బోతి ఆహ ‘‘నివత్తనగణనాయా’’తి. పదాదిగణనాయాతి పదఅనుపదాదిగణనాయాతి. తతియం.

౪. చతుత్థసిక్ఖాపదం

౯౪౯. చతుత్థే అనుత్తానట్ఠానం నత్థీతి. చతుత్థం.

౫. పఞ్చమసిక్ఖాపదం

౯౫౨. పఞ్చమే ఆణత్తా భిక్ఖునీతి యోజనా. ఇదఞ్చ పచ్చాసన్నవసేన వుత్తం యంకిఞ్చిపి ఆణాపేతుం సక్కుణేయ్యత్తాతి. పఞ్చమం.

౬-౯. ఛట్ఠాదిసిక్ఖాపదం

౯౫౫. ఛట్ఠ-సత్తమ-అట్ఠమ-నవమేసు అనుత్తానవచనం నత్థీతి. ఛట్ఠ సత్తమ అట్ఠమ నవమాని.

౧౦. దసమసిక్ఖాపదం

౯౭౩. దసమే అహున్దరికాతి తస్మిం కాలే, దేసే వా సమ్బాధస్స నామమేతన్తి ఆహ ‘‘అహున్దరికాతి సమ్బాధా’’తి.

౯౭౫. యథా ‘‘ఉత్తరిఛప్పఞ్చవాచాహీ’’తి (పాచి. ౬౨-౬౫) ఏత్థ పఞ్చసద్దో న కోచి అత్థో, వాచాసిలిట్ఠత్థం లోకవోహారవసేన వుత్తో, న ఏవమిధ, ఇధ పన అత్థో అత్థి, పఞ్చ యోజనాని గచ్ఛన్తియాపి అనాపత్తియేవాతి ఆహ ‘‘పవారేత్వా…పే… అనాపత్తీ’’తి. పచ్చాగచ్ఛతీతి పటినివత్తేత్వా ఆగచ్ఛతీతి. దసమం.

తువట్టవగ్గో చతుత్థో.