౫. పఞ్చమసిక్ఖాపదం

౯౦౩. పఞ్చమే ‘‘చీవరసఙ్కమనీయ’’న్తిఏత్థ సఙ్కమేతబ్బం పటిదాతబ్బన్తి సఙ్కమనీయన్తి కముధాతుస్స పటిదానత్థఞ్చ అనీయసద్దస్స కమ్మత్థఞ్చ, ‘చీవరఞ్చ తం సఙ్కమనీయఞ్చే’తి చీవరసఙ్కమనీయన్తి విసేసనపరపదభావఞ్చ దస్సేన్తో ఆహ ‘‘సఙ్కమేతబ్బం చీవర’’న్తి. తత్థ ‘‘సఙ్కమేతబ్బం చీవర’’న్తి ఇమినా కమ్మత్థఞ్చ విసేసనపరపదభావఞ్చ దస్సేతి. ‘‘పటిదాతబ్బచీవర’’న్తి ఇమినా కముధాతుయా అత్థం దస్సేతి అధిప్పాయవసేనాతి. పఞ్చమం.