౨. అన్ధకారవగ్గో

౧. పఠమసిక్ఖాపద-అత్థయోజనా

౮౩౯. అన్ధకారవగ్గస్స పఠమే అప్పదీపేతి ఉపలక్ఖణవసేన వుత్తత్తా అఞ్ఞేపి ఆలోకా గహేతబ్బాతి దస్సేన్తో ఆహ ‘‘పదీపచన్దసూరియఅగ్గీసూ’’తిఆది. అస్సాతి ‘‘అప్పదీపే’’తిపదస్స.

౮౪౧. నరహోఅస్సాదాపేక్ఖా హుత్వా చ రస్సాదతో అఞ్ఞవిహితావ హుత్వా చాతి యోజనా. ఇమినా ‘‘సన్తిట్ఠతి వా సల్లపతి వా’’తి పదే కిరియావిసేసనభావం దస్సేతి. దానేన వా నిమిత్తభూతేన, పూజాయ వా నిమిత్తభూతాయ మన్తేతీతి యోజనాతి. పఠమం.

౨. దుతియసిక్ఖాపదం

౮౪౨. దుతియే ఇదమేవ పదం నానన్తి సమ్బన్ధోతి. దుతియం.

౩. తతియసిక్ఖాపదం

౮౪౬. తతియే ‘‘ఇదమేవా’’తి పదం అనువత్తేతబ్బం. తాదిసమేవాతి పఠమసదిసమేవాతి అత్థోతి. తతియం.

౪. చతుత్థసిక్ఖాపదం

౮౫౦. చతుత్థే కణ్ణస్స సమీపం నికణ్ణం, తమేవ నికణ్ణికన్తి వుత్తే కణ్ణమూలన్తి ఆహ ‘‘కణ్ణమూలం వుచ్చతీ’’తి. ‘‘కణ్ణమూలే’’తి ఇమినా ‘‘నికణ్ణిక’’న్తి ఏత్థ భుమ్మత్థే ఉపయోగవచనన్తి దస్సేతి. ఆహరణత్థాయాతి ఆహరాపనత్థాయాతి. చతుత్థం.

౫. పఞ్చమసిక్ఖాపదం

౮౫౪. పఞ్చమే తేసన్తి ఘరసామికానం. ఘరమ్పీతి న కేవలం ఆసనమేవ, ఘరమ్పి సోధేమాతి అత్థో. తతోతి పరివితక్కనతో, పరన్తి సమ్బన్ధో.

౮౫౮. చోరా వా ఉట్ఠితా హోన్తీతి యోజనాతి. పఞ్చమం.

౬. ఛట్ఠసిక్ఖాపదం

౮౬౦. ఛట్ఠే అభినిసీదేయ్యాతి ఏత్థ అభిసద్దో ఉపసగ్గమత్తోవాతి దస్సేన్తో ఆహ ‘‘నిసీదేయ్యా’’తి. ఏసేవ నయో అభినిపజ్జేయ్యాతి ఏత్థాపి. ద్వే ఆపత్తియోతి సమ్బన్ధోతి. ఛట్ఠం.

౭. సత్తమసిక్ఖాపదం

౮౬౪. సత్తమే సబ్బన్తి సకలం వత్తబ్బవచనన్తి. సత్తమం.

౮. అట్ఠమసిక్ఖాపదం

౮౬౯. అట్ఠమే అనుత్తానవచనం నత్థీతి. అట్ఠమం.

౯. నవమసిక్ఖాపదం

౮౭౫. నవమే అభిసపేయ్యాతి ఏత్థ సపధాతుస్స అక్కోసనత్థం అన్తోకత్వా కరధాతుయా అత్థం దస్సేన్తో ఆహ ‘‘సపథం కరేయ్యా’’తి. నిరయే నిబ్బత్తామ్హీతి అహం నిరయే నిబ్బత్తా అమ్హీతి యోజనా. నిరయే నిబ్బత్తతూతి ఏసా భిక్ఖునీ నిరయే నిబ్బత్తతూతి యోజనా. ఈదిసా హోతూతి మమ సదిసా హోతూతి అత్థో. కాణాతి ఏకక్ఖికాణా, ద్వక్ఖికాణా వా. కుణీతి హత్థపాదాదివఙ్కా.

౮౭౮. ఏదిసాతి విరూపాదిజాతికా. విరమస్సూతి విరమాహి. అద్ధాతి ధువన్తి. నవమం.

౧౦. దసమసిక్ఖాపదం

౮౭౯. దసమే అనుత్తానట్ఠానం నత్థీతి. దసమం.

అన్ధకారవగ్గో దుతియో.