౬. ఛట్ఠనిస్సగ్గియపాచిత్తియసిక్ఖాపదం

౭౫౮. ఛట్ఠే ఛన్దం ఉప్పాదేత్వా గహితం ఛన్దకన్తి వచనత్థం దస్సేన్తో ఆహ ‘‘ఛన్దక’’న్తిఆది. ధమ్మకిచ్చన్తి పుఞ్ఞకరణీయం. ధమ్మసద్దో హేత్థ పుఞ్ఞవాచకో. యన్తి వత్థుం. పరేసన్తి అత్తనా అఞ్ఞేసం. ‘‘ఏత’’న్తి ‘‘ఛన్దక’’న్తి ఏతం నామం. ‘‘అఞ్ఞస్సత్థాయ దిన్నేనా’’తిఇమినా అఞ్ఞస్స అత్థో అఞ్ఞదత్థో, దకారో పదసన్ధికరో, తదత్థాయ దిన్నో అఞ్ఞదత్థికోతి వచనత్థం దస్సేతి. ‘‘అఞ్ఞం ఉద్దిసిత్వా దిన్నేనా’’తిఇమినా అఞ్ఞం ఉద్దిసిత్వా దిన్నం అఞ్ఞుద్దిసికన్తి వచనత్థం దస్సేతి. ‘‘సఙ్ఘస్స పరిచ్చత్తేనా’’తి ఇమినా సఙ్ఘస్స పరిచ్చత్తో సఙ్ఘికోతి వచనత్థం దస్సేతి.

౭౬౨. యదత్థాయాతి యేసం చీవరాదీనం అత్థాయ. యసద్దేన సమాసభావతో పుబ్బే నిగ్గహితాగమో హోతి. తన్తి చీవరాదికం. తుమ్హేహీతి దాయకే సన్ధాయ వుత్తం. ఉపద్దవేసూతి దుబ్భిక్ఖాదిఉపసగ్గేసు. యం వా తం వాతి చీవరం వా అఞ్ఞే వా పిణ్డపాతాదికేతి యం వా తం వాతి. ఛట్ఠం.