౧౩. తేరసమసిక్ఖాపదం

౧౨౨౬. తేరసమే ఉపచారేపీతి అపరిక్ఖిత్తస్స గామస్స పరిక్ఖేపారహట్ఠానసఙ్ఖాతే ఉపచారేపి.

౧౨౨౭. ‘‘అచ్ఛిన్నచీవరికాయా’’తి సామఞ్ఞతో వుత్తేపి విసేసోయేవాధిప్పేతోతి ఆహ ‘‘సఙ్కచ్చికచీవరమేవా’’తి. సమన్తతో పురిసానం దస్సనం కన్తీయతి ఛిన్దీయతి ఏత్థాతి సఙ్కచ్చి, అధక్ఖకఉబ్భనాభిట్ఠానం, సఙ్కచ్చే నివసితబ్బన్తి సంకచ్చికం, తమేవ చీవరన్తి సఙ్కచ్చికచీవరన్తి. తేరసమం.

ఛత్తుపాహనవగ్గో నవమో.

సబ్బానేవ సిక్ఖాపదానీతి సమ్బన్ధో. తతోతి తేహి అట్ఠాసీతిసతసిక్ఖాపదేహి, అపనేత్వాతి సమ్బన్ధో.

తత్రాతి తేసు ఖుద్దకేసు. ఏత్థాతి దససు సిక్ఖాపదేసూతి.

భిక్ఖునివిభఙ్గే ఖుద్దకవణ్ణనాయ

యోజనా సమత్తా.