౭. నిసీదనసిక్ఖాపదం

౫౩౧. సత్తమే కత్థాతి కిస్మిం ఖన్ధకే, కిస్మిం వత్థుస్మిం వా. హీతి సచ్చం. తత్థాతి చీవరక్ఖన్ధకే, పణీతభోజనవత్థుస్మిం వా. ‘‘యథా నామా’’తి ఇమినా ‘‘సేయ్యథాపీ’’తి పదస్స అత్థం దస్సేతి, ‘‘పురాణో చమ్మకారో’’తి ఇమినా ‘‘పురాణాసికోట్ఠో’’తి పదస్స. చమ్మకారో హి అసినా చమ్మం కుటతి ఛిన్దతీతి ‘‘అసికోట్ఠో’’తి వుచ్చతి. వత్థుప్పన్నకాలముపనిధాయ వుత్తం ‘‘పురాణో’’తి. తమేవూపమం పాకటం కరోన్తో ఆహ ‘‘యథా హీ’’తి. హీతి తప్పాకటీకరణం, తం పాకటం కరిస్సామీతి హి అత్థో. చమ్మకారో కడ్ఢతీతి సమ్బన్ధో. విత్థతన్తి విసాలం. సోపీతి ఉదాయీపి. తం నిసీదనం కడ్ఢతీతి యోజనా. తేనాతి కడ్ఢనహేతునా. తన్తి ఉదాయిం. సన్థతసదిసన్తి సన్థతేన సదిసం. ఏకస్మిం అన్తేతి ఏకస్మిం కోట్ఠాసే, ఫాలేత్వాతి సమ్బన్ధోతి. సత్తమం.