౬. జోతిసిక్ఖాపదం

౩౫౦. ఛట్ఠే జనపదస్స నామత్తా బహువచనవసేన ‘‘భగ్గేసూ’’తి పాళియం వుత్తం. సుసుమారసణ్ఠానో పబ్బతసఙ్ఖాతో గిరి ఏత్థాతి సుసుమారగిరి, ఏతస్స వా మాపితకాలే సుసుమారో గిరతి సద్దం నిగ్గిరతి ఏత్థాతి సుసుమారగిరీతి అత్థమనపేక్ఖిత్వా వుత్తం ‘‘నగరస్స నామ’’న్తి. తం పనాతి వనం పన. ‘‘మిగాన’’న్తిఆదినా మిగానం అభయో దీయతి ఏత్థాతి మిగదాయోతి అత్థం దస్సేతి.

౩౫౨. ‘‘జోతికే’’తిపదస్స జోతిస్స అగ్గిస్స కరణం జోతికన్తి దస్సేతుం వుత్తం ‘‘జోతికరణే’’తి.

౩౫౪. ‘‘సమాదహితుకామతాయా’’తిపదం ‘‘అరణిసణ్ఠాపనతో’’తిపదే హేతు. జాలాతి సిఖా. సా హి జలతి దిబ్బతీతి జాలాతి వుచ్చతి.

పతిలాతం ఉక్ఖిపతీతి ఏత్థ ‘‘పతితాలాత’’న్తి వత్తబ్బే తకారలోపం కత్వా సన్ధివసేన పతిలాతన్తి వుత్తన్తి ఆహ ‘‘అలాతం పతితం ఉక్ఖిపతీ’’తి. అలాతన్తి ఉమ్ముక్కం. తఞ్హి ఆదిత్తం హుత్వా అతిఉణ్హత్తా న లాతబ్బం న గణ్హితబ్బన్తి అలాతన్తి వుచ్చతి. అవిజ్ఝాతన్తి ఝాయనతో డయ్హనతో అవిగతం అలాతన్తి సమ్బన్ధో. ఝాయనం డయ్హనం ఝాతం, విగతం ఝాతం ఇమస్సాలాతస్సాతి విజ్ఝాతం.

౩౫౬. పదీపాదీనీతి పదీపజోతికాదీని. తత్థాతి తాసు దుట్ఠవాళమిగఅమనుస్ససఙ్ఖాతాసు ఆపదాసు నిమిత్తభూతాసు. నిమిత్తత్థే చేతం భుమ్మవచనన్తి. ఛట్ఠం.