౪. ఘోటముఖసుత్తవణ్ణనా

౪౧౨. ఖేమియా నామ రఞ్ఞో దేవియా రోపితత్తా తం అమ్బవనం ఖేమియమ్బవనన్తి వుచ్చతీతి వదన్తి. ధమ్మికోతి ధమ్మయుత్తో సబ్బసోవ అధమ్మం పహాయ ధమ్మే ఠితో. పరిబ్బజతి పబ్బజతి ఏతేనాతి పరిబ్బజో, ఘరావాసతో నిక్ఖమనపుబ్బకం లిఙ్గగ్గహణవసేన సీలసమాదానం. ఏత్థాతి ఏతస్మిం పరిబ్బజే. సభావోతి తం పరిబ్బాజనియం, తేహి తేహి పరిబ్బాజకేహి అనుట్ఠాతబ్బో పటిపత్తిధమ్మసఙ్ఖాతో సభావో. ధమ్మోవ పమాణన్తి ఏతేన మయం అహిరిమనా చిత్తస్స యథాఉపట్ఠితం కథేమ, తస్మా తం అప్పమాణం, యో పనేత్థ అవితథో ధమ్మో, తదేవ పమాణం. అధిగతపటిపత్తిసఙ్ఖాతో సభావో అత్థి, తస్స తుమ్హేహి తుమ్హేహి బహునా నానాసన్దస్సనాది కమ్మేన ఇధ భవితబ్బం, బహుదేవేత్థ వత్తబ్బన్తి అధిప్పాయో.

౪౧౪. సారత్తరత్తాతి సారజ్జనవసేన రత్తా, బహులరాగవసేన అభిరత్తాతి అత్థో. అత్తనా ఞాపేతబ్బమత్థం అనుగ్గహాపేతి బోధేతీతి అనుగ్గహో, ఞాపితకారణం, సహ అనుగ్గహేనాతి సానుగ్గహా. తేనాహ ‘‘సకారణా’’తి. కిం పన తం కారణం? ఇమస్సాధిప్పాయో ‘‘నత్థి ధమ్మికో పరిబ్బజో’’తి మయా వుత్తో, అద్ధా పనాయస్మా ఉదేనో యాథావతో ధమ్మికం పరిబ్బజం మే ఆచిక్ఖతీతి. తేనాహ ‘‘వుత్తఞ్హేత’’న్తిఆది.

౪౨౧. సబ్బమిదం థావరజఙ్గమం పురిసకతం, తస్మా యం కిఞ్చి కత్వా అత్తా పోసేతబ్బో రక్ఖితబ్బోతి లోకాయతనిస్సితో నీతిమగ్గో ఘోటముఖకన్తో, తస్మా ఆహ ‘‘ఏతస్స కిర జాననసిప్పే’’తిఆది. సగ్గే నిబ్బత్తో నామ నత్థి అకత్తబ్బమేవ కరణతో. దేవలోకపరియాపన్నధనం మనుస్సానం ఉపకప్పపుఞ్ఞాభావతో పుబ్బే అత్తనా నిహితధనం ‘‘అసుకే చా’’తి ఆచిక్ఖిత్వా గతో. సేసం సువిఞ్ఞేయ్యమేవ.

ఘోటముఖసుత్తవణ్ణనాయ లీనత్థప్పకాసనా సమత్తా.