౪. పాచిత్తియనిద్దేసో

౩౦. సమ్పజానముసావాదే, పాచిత్తియముదీరితం;

భిక్ఖుఞ్చ ఓమసన్తస్స, పేసుఞ్ఞహరణేపి చ.

౩౧. ఠపేత్వా భిక్ఖునిం భిక్ఖుం, అఞ్ఞేన పిటకత్తయం;

పదసోధమ్మం భణన్తస్స, పాచిత్తియముదీరితం.

౩౨. అనుపసమ్పన్నేనేవ, సయిత్వాన తిరత్తియం;

పాచిత్తి సహసేయ్యాయ, చతుత్థత్థఙ్గతే పున.

౩౩. ఇత్థియా ఏకరత్తమ్పి, సేయ్యం కప్పయతోపి వా;

దేసేన్తస్స వినా విఞ్ఞుం, ధమ్మఞ్చ ఛప్పదుత్తరిం.

౩౪. దుట్ఠుల్లం భిక్ఖునో వజ్జం, భిక్ఖుసమ్ముతియా వినా;

అభిక్ఖునో వదన్తస్స, పాచిత్తియముదీరితం.

౩౫. ఖణేయ్య వా ఖణాపేయ్య, పథవిఞ్చ అకప్పియం;

భూతగామం వికోపేయ్య, తస్స పాచిత్తియం సియా.

౩౬. అజ్ఝోకాసే తు మఞ్చాదిం, కత్వా సన్థరణాదికం;

సఙ్ఘికం యాతి పాచిత్తి, అకత్వాపుచ్ఛనాదికం.

౩౭. సఙ్ఘికావసథే సేయ్యం, కత్వా సన్థరణాదికం;

అకత్వాపుచ్ఛనాదిం యో, యాతి పాచిత్తి తస్సపి.

౩౮. జానం సప్పాణకం తోయం, పాచిత్తి పరిభుఞ్జతో;

అఞ్ఞాతికా భిక్ఖునియా, ఠపేత్వా పారివత్తకం.

౩౯. చీవరం దేతి పాచిత్తి, చీవరం సిబ్బతోపి చ;

అతిరిత్తం అకారేత్వా, పవారేత్వాన భుఞ్జతో.

౪౦. భిక్ఖుం ఆసాదనాపేక్ఖో, పవారేతి పవారితం;

అనతిరిత్తేన భుత్తే తు, పాచిత్తియముదీరితం.

౪౧. సన్నిధిభోజనం భుఞ్జే, వికాలే యావకాలికం;

భుఞ్జతో వాపి పాచిత్తి, అగిలానో పణీతకం.

౪౨. విఞ్ఞాపేత్వాన భుఞ్జేయ్య, సప్పిభత్తాదికమ్పి చ;

అప్పటిగ్గహితం భుఞ్జే, దన్తకట్ఠోదకం వినా.

౪౩. తిత్థియస్స దదే కిఞ్చి, భుఞ్జితబ్బం సహత్థతో;

నిసజ్జం వారహో కప్పే, మాతుగామేన చేకతో.

౪౪. సురామేరయపానేపి, పాచిత్తియముదీరితం;

అఙ్గులిపతోదకే చాపి, హసధమ్మేపి చోదకే.

౪౫. అనాదరేపి పాచిత్తి, భిక్ఖుం భీసయతోపి వా;

భయానకం కథం కత్వా, దస్సేత్వా వా భయానకం.

౪౬. ఠపేత్వా పచ్చయం కిఞ్చి, అగిలానో జలేయ్య వా;

జోతిం జలాపయేయ్యాపి, తస్స పాచిత్తియం సియా.

౪౭. కప్పబిన్దుమనాదాయ, నవచీవరభోగినో;

హసాపేక్ఖస్స పాచిత్తి, భిక్ఖునో చీవరాదికం.

౪౮. అపనేత్వా నిధేన్తస్స, నిధాపేన్తస్స వా పన;

జానం పాణం మారేన్తస్స, తిరచ్ఛానగతమ్పి చ.

౪౯. ఛాదేతుకామో ఛాదేతి, దుట్ఠుల్లం భిక్ఖునోపి చ;

గామన్తరగతస్సాపి, సంవిధాయిత్థియా సహ.

౫౦. భిక్ఖుం పహరతో వాపి, తలసత్తికముగ్గిరే;

చోదేతి వా చోదాపేతి, గరుకామూలకేనపి.

౫౧. కుక్కుచ్చుప్పాదనే చాపి, భణ్డనత్థాయుపస్సుతిం;

సోతుం భణ్డనజాతానం, యాతి పాచిత్తియం సియా.

౫౨. సఙ్ఘస్స లాభం పరిణామితం తు,

నామేతి యో తం పరపుగ్గలస్స;

పుచ్ఛం అకత్వాపి చ సన్తభిక్ఖుం,

పాచిత్తి గామస్స గతే వికాలేతి.