౨. గరుకాపత్తినిద్దేసో

౧౦. మోచేతుకామచిత్తేన, ఉపక్కమ్మ విమోచయం;

సుక్కమఞ్ఞత్ర సుపినా, సమణో గరుకం ఫుసే.

౧౧. కాయసంసగ్గరాగేన, మనుస్సిత్థిం పరామసం;

ఇత్థిసఞ్ఞీ ఉపక్కమ్మ, సమణో గరుకం ఫుసే.

౧౨. దుట్ఠుల్లవాచస్సాదేన, మగ్గం వారబ్భ మేథునం;

ఓభాసన్తో మనుస్సిత్థిం, సుణమానం గరుం ఫుసే.

౧౩. వణ్ణం వత్వాత్తనోకామ-పారిచరియాయ మేథునం;

ఇత్థిం మేథునరాగేన, యాచమానో గరుం ఫుసే.

౧౪. సన్దేసం పటిగ్గణ్హిత్వా, పురిసస్సిత్థియాపి వా;

వీమంసిత్వా హరంపచ్చా, సమణో గరుకం ఫుసే.

౧౫. చావేతుకామో చోదేన్తో, అమూలన్తిమవత్థునా;

చోదాపయం వా సమణో, సుణమానం గరుం ఫుసే.

౧౬. లేసమత్తం ఉపాదాయ, అమూలన్తిమవత్థునా;

చావేతుకామో చోదేన్తో, సుణమానం గరుం ఫుసేతి.