౪౫. పవారణానిద్దేసవణ్ణనా

౪౩౩. ‘‘అనుజానామి, భిక్ఖవే, పఞ్చన్నం సఙ్ఘే పవారేతు’’న్తి (మహావ. ౨౧౫) వుత్తత్తా ‘‘సేసా సఙ్ఘప్పవారణా’’తి (మహావ. ౨౧౫ ఆదయో) వుత్తా.

౪౩౪. అజ్జ పవారణాతి ఏత్థ (మహావ. ౨౧౫ ఆదయో) పన చాతుద్దసికాయ పవారణాయ ‘‘అజ్జ పవారణా చాతుద్దసీ’’తి పుబ్బకిచ్చం కాతబ్బం, పన్నరసియం ‘‘అజ్జ పవారణా పన్నరసీ’’తి.

౪౩౭. థేరేసు ఉక్కుటికం నిసజ్జ పవారేన్తేసు సయం పన నవో యావ పవారేతి, తావ ఉక్కుటికోవ అచ్ఛతూతి అత్థో. ‘‘న భిక్ఖవే థేరేసు ఉక్కుటికం నిసిన్నేసు పవారయమానేసు ఆసనేసు అచ్ఛితబ్బం. యో అచ్ఛేయ్య, ఆపత్తి దుక్కటస్స. అనుజానామి, భిక్ఖవే, తదమన్తరా ఉక్కుటికం నిసీదితుం, యావ పవారేతి, పవారేత్వా ఆసనే నిసీదితు’’న్తి (మహావ. ౨౧౧) హి వుత్తం.

౪౪౦-౨. ఏవం తేవాచికప్పవారణం దస్సేత్వా ఇదాని ద్వేవాచికఏకవాచికసమానవస్సికప్పవారణాసు కత్తబ్బం దస్సేతుం ‘‘దానేనా’’తిఆదిమాహ. తత్థ దానేనాతి దానేన వా. ధమ్మసాకచ్ఛాతి ఇమినా ధమ్మకథాసుత్తసఙ్గాయనావినయవినిచ్ఛయాదయో గహితా. దానేన వా ధమ్మసాకచ్ఛాయ వా కలహేన వా రత్తియా ఖేపితభావతో తేవాచికాయ ఓకాసే అసతి దసవిధే వా అన్తరాయే అనురూపతో ఉత్తిం ఠపేత్వా పవారేయ్యాతి సమ్బన్ధో.

ఇదాని యథానురూపతో ఞత్తి ఠపితా, తం దస్సేతుం ‘‘సుణాతు మే’’తిఆదిమాహ. యథాఠపితఞత్తియాతి ఏత్థ సబ్బసఙ్గాహికాచేఞత్తిఠపితా, తేవాచికద్వేవాచికఏకవాచికానం వసేన పవారేతబ్బం, సమానవస్సికప్పవారణావ ఏకా న వట్టతి. సచే ‘‘సఙ్ఘో తేవాచికం పవారేయ్యా’’తి ఠపితా, తేవాచికా ఏవ వట్టతి, ద్వేవాచికాదయో న వట్టన్తి. ‘‘ద్వేవాచికం పవారేయ్యా’’తి వుత్తే ద్వేవాచికఞ్చ తేవాచికఞ్చ వట్టతి, ఏకవాచికసమానవస్సికా న వట్టన్తి. ‘‘ఏకవాచికం పవారేయ్యా’’తి వుత్తే పన సమానవస్సికం ఠపేత్వా సేసా వట్టన్తి. ‘‘సమానవస్సిక’’న్తి పన వుత్తే సబ్బం వట్టతీతి. ఆదికే చేత్థ ఆహరేతి ఏత్థ పవారణాయపి పుబ్బే ఉపోసథే వుత్తే ‘‘యది సమా ఆగచ్ఛేయ్యు’’న్తిఆదికే వారే ఆహరేతి అత్థో.

౪౪౩. ఇదాని వత్తబ్బం సన్ధాయ ‘‘ఏవ’’న్తి వుత్తం. తివగ్గో చ చతువగ్గో చ తిచతువగ్గో.

౪౫౦. ‘‘న భిక్ఖవే సాపత్తికేన పవారేతబ్బం. యో పవారేయ్య, ఆపత్తి దుక్కటస్సా’’తి (మహావ. ౨౩౫) వుత్తత్తా సాపత్తికేనపి వేమతికేనపి పవారియమానే ఆపత్తిం సరన్తేనపి ఉపోసథే వుత్తనయేన పటిపజ్జితబ్బం. ‘‘వగ్గే సమగ్గే వగ్గోతి-సఞ్ఞినో విమతిస్స వా’’తిఆదిగాథాతో పట్ఠాయ యావ ‘‘అన్తరాయం వ సఙ్ఘం వా-ధిట్ఠాతుం సీమమేవ వా’’తి అవసానగాథా, తావ సేసా ఉపోసథే వుత్తా గాథాయోతి అధిప్పేతా.

౪౫౧. పవారితే చాతి (మహావ. ౨౧౩ ఆదయో) పఠమపవారణాయ సఙ్ఘమ్హి పవారితేతి అధిప్పాయో. ఏత్థ అవుత్థోతి పచ్ఛిమికాయ ఉపగతో అపరినిట్ఠితత్తా ‘‘అవుత్థో’’తి వుచ్చతి.

౪౫౨. చాతుమాసినీతి కత్తికపుణ్ణమీ. ఏత్థ వుత్థవస్సా నామ పచ్ఛిమికాయ ఉపగతా. పవారణావినిచ్ఛయో.

పవారణానిద్దేసవణ్ణనా నిట్ఠితా.