౨౪. అఞ్జనీనిద్దేసవణ్ణనా

౧౮౨. వట్టా వా అట్ఠసోళసంసా వా మట్ఠా పుప్ఫలతాదీహి అచిత్తకా అఞ్జనీ వట్టతీతి అత్థో. తిస్సోపి వట్టన్తి, ఏకాయ వా ద్వీసు వా కథా ఏవ నత్థీతి అధిప్పాయో. లేఖాతి వట్టలేఖా. బన్ధితున్తి పిధానకబన్ధనత్థం.

౧౮౩. రూపన్తి సకుణరూపాది. యది చ ఏదిసం అఞ్ఞేహి కతం లభతి, ఘంసిత్వా వా ఛిన్దిత్వా వా యథా వా న పఞ్ఞాయతి, తథా సుత్తేన వేఠేత్వా వళఞ్జేతబ్బం.

౧౮౪. థవికాతి అఞ్జనిథవికా. అఞ్జనిసలాకాపి లబ్భతీతి సమ్బన్ధో.

౧౮౫-౬. అట్ఠీతి (మహావ. ౨౬౬; మహావ. అట్ఠ. ౨౬౪) మనుస్సట్ఠిం ఠపేత్వా అవసేసట్ఠి. విసాణదన్తేసు అకప్పియం నామ నత్థి. ఆమలకకక్కాదీహి కతా ఫలమయా. తమ్మయాతి ఇధ వుత్తేహేవ నిబ్బత్తా. అఞ్జనీవినిచ్ఛయో.

అఞ్జనీనిద్దేసవణ్ణనా నిట్ఠితా.