౫౦. విపస్సనానిద్దేసో
విపస్సనాతి –
౪౭౧. నామరూపం పరిగ్గయ్హ, తతో తస్స చ పచ్చయం;
హుత్వా అభావతోనిచ్చా, ఉదయబ్బయపీళనా.
౪౭౨. దుక్ఖా అవసవత్తిత్తా, అనత్తాతి తిలక్ఖణం;
ఆరోపేత్వాన సఙ్ఖారే, సమ్మసన్తో పునప్పునం;
పాపుణేయ్యానుపుబ్బేన, సబ్బసంయోజనక్ఖయన్తి.
నిగమనకథా
౪౭౩. అధిసీలాధిచిత్తానం, అధిపఞ్ఞాయ సిక్ఖనా;
భిక్ఖుకిచ్చమతో ఖుద్దసిక్ఖాయం సముదాహటా.
౪౭౪. మహతో కిత్తిసద్దస్స, యస్స లోకవిచారినో;
పరిస్సమో న సమ్భోతి, మాలుతస్సేవ నిచ్చసో.
౪౭౫. తేన ధమ్మసిరీకేన, తమ్బపణ్ణియకేతునా;
థేరేన రచితా ధమ్మవినయఞ్ఞుపసంసితా.
౪౭౬. ఏత్తావతాయం నిట్ఠానం, ఖుద్దసిక్ఖా ఉపాగతా;
పఞ్చమత్తేహి గాథానం, సతేహి పరిమాణతోతి.
ఖుద్దసిక్ఖా నిట్ఠితా.
నమో తస్స భగవతో అరహతో సమ్మాసమ్బుద్ధస్స